Монгол Улсын Их Хурлын ес дэх удаагийн сонгуулийн үр дүнд байгуулагдсан 126 гишүүн бүхий Улсын Их Хурлын анхны ээлжит чуулганыг өнөөдөр нээлээ. Энэ үеэр УИХ-ын дарга Д.Амарбаясгалан чуулганыг нээж үг хэллээ.

УИХ-ын дарга Д.Амарбаясгалан:

-УИХ-ын намрын ээлжит чуулганы нээлтэд 100 гишүүн ирснээр 79 хувийн ирцтэй нээлээ. Намрын чуулганы нээлтэд Ерөнхий сайд Л.Оюун-Эрдэнэ, Засгийн газрын гишүүд, Монгол Улсад суугаа гадаад орнуудын Элчин сайд нар, Үндэсний аюулгүй байдлын зөвлөлийн нарийн бичгийн дарга, Үндсэн хуулийн Цэцийн дарга, гишүүд, Улсын дээд шүүх, Шүүхийн ерөнхий зөвлөл, УИХ-аас удирдлага нь томилогддог байгууллагуудын дарга нар, нийслэлийн Засаг дарга тэргүүтэй албаны хүмүүс оролцож байна.

УИХ-ын анхдугаар чуулганаар бид Засгийн газрыг байгуулсан бол ээлжит бус чуулганаар 2024-2028 оны Засгийн газрын үйл ажиллагааны хөтөлбөр, 2024 оны төсвийн тодотгол зэрэг хэд, хэдэн чухал төслүүдийг хэлэлцэн шийдвэрлэсэн.

Энэ удаагийн намрын чуулганаар бид эдийн засгийн тогтвортой хангах, хөрөнгө оруулалтын орчныг илүү боловсронгуй болгож, гадаадын хөрөнгө оруулалтын нэмэгдүүлж, нэг салбараас хамааралтай эдийн засгийн суурийг өргөжүүлж солонгоруулах, дотоодын бизнес эрхлэгчдийг дэмжих, эдийн засаг дахь төрийн оролцоог багасгах хууль эрх зүйн шинэчлэлийг хийх шаардлагатай байна.

Учир нь манай улсын эдийн засаг, нийгэм, улс төрийн нөхцөл байдалд эерэг өөрчлөлт гарч, олон улсын Фитч агентлаг Монгол Улсын зээлжих зэрэглэлийг B+ түвшинд хүргэж ахиуллаа. Бүс нутгийн орнуудтай харьцуулахад Монгол Улсын эдийн засгийн өсөлт илүү байж, бидний хийсэн ажил ийнхүү зээлжих зэрэглэлд нөлөөлж, орлогоо төрөлжүүлэх боломжийг нээж өглөө.

Хамтарсан Засгийн газраас өргөн мэдүүлсэн 2025 оны төсвийн тухай хуулийн төсөл нь улс орны хөгжлийг шинэ шатанд гаргах, их бүтээн байгуулалтын эхлэлийг тавьж, нэг хүнд ногдох ДНБ-ийг 10 мянган ам.долларт хүргэж, дунд хугацааны зорилтыг биелүүлэхэд чиглэж байна.

Намрын чуулганаар хэлэлцэх Монгол Улсын 2025 оны төсвийн хууль болон дагалдах хууль тогтоомжууд нь Монгол Улсын ирэх дөрвөн жилийн хөгжлийн ерөнхий хандлага эдийн засгийн өсөлтийг илүү тодорхойлох тул УИХ-ын зүгээс Засгийн газраас авч хэрэгжүүлэх мега төсөл хөтөлбөр, хөрөнгө оруулалтын бодит хүрэх үр дүнг нарийвчлан судалж, өмнөх алдаа сургамжаа эргэн санаж, ирээдүйд үүсэж болох эрсдэлийг урьдчилан тооцох шаардлагатай байна гэв.

---