Байгалийн хүнд нөхцөлд байгаа малчдад шаардлагатай эд материал, өвс тэжээлээр туслах "Бид Монголчууд" аяныг санаачилсан байгууллагуудын төлөөллүүд өнөөдөр мэдээлэл хийв.

МҮБХ-ны тэргүүн Ц.Магалжав:

-Монголын Үндэсний Бөхийн Холбоо нийгмийн хариуцлагын хүрээнд цас зудтай байгаа малчдад туслах аянд нэгдэж ажиллаж байгаа. Ирэх сарын 1-нд үндэсний бөхийн хандивын барилдааныг зохион байгуулна. 

Бөхчүүд маань цас зудын нөхцөл хүнд хэцүү байгаа сум орон нутагтаа хандивын аян зохион байгуулж оролцоно гэдгээ илэрхийлсэн. 

Монголын Морин Спорт, Уяачдын Холбоо-ны дэд ерөнхийлөгч Ц.Гончигсүрэн:

-Морин спортын хорооноос "Бид Монголчууд" хандив тусламжийн аянд нэгдэж байна. Манай холбооноос цар тахлын үеэр 120 сая төгрөг хандивлаж байсан. ММСУХ-нд 120 мянган уяач байдаг. Үүнээс улсын алдар цолтой уяачид өөрсдийн хурдан хүлгүүдээс дуудлага худалдаа зохион байгуулж цас, зудын нөхцөл байдалд хандив өргөнө.

Мөн мал, малчнаас хамааралтай үйл ажиллагаа явуулдаг аж ахуйн нэгжүүд хамтарч тусламжийн аянд оролцоосой гэж уриалж байна. Цугларсан хандивыг Онцгой байдлын дансанд төвлөрүүлнэ гэв. 

---