Р.Сэддорж: Нохойд хазуулсан эмэгтэйд ажил үүргээ хэвийн гүйцэтгэх хүртэл нь тусламж үзүүлнэ

Золбин нохойд бариулж байгаа нэгэн эмэгтэй ба энэ үйл явдлыг машинаасаа хараад ямар нэгэн тусламж үзүүлэлгүйгээр явсан жолоочийн бичлэг өчигдөр цацагдсан билээ. 

Энэ талаар хохирогчийн нөхөр нь “Гудамжны сүрэг нохдод хазуулж байхад Land200 /31-32 УНЧ/ унасан иргэн харсаар байж тусламж үзүүлээгүйд гомдолтой байна” гэсэн юм. Хэргийг нягталбал, өчигдөр /2023.09.06/ 11:45 цагт Өмнөговь аймгийн төв дэх "Цогжавхлан" дэлгүүрийн гадна эмэгтэй хүн рүү гудамжны ноход дайрч, хазаж гэмтээжээ. Эмэгтэй одоогоор маш хүнд гэмтэлтэй, арав гаруй оёдол тавиулж, эмнэлэгт хэвтэж байгаа юм. 

Харин энэ талаар Өмнөговь аймгийн Засаг дарга Р.Сэддорж: 

-Маш харамсалтай үйл явдал боллоо. Нохойд хазуулсан эмэгтэй эмнэлэг дээр арав гаруй оёдол тавиулсан, хүнд гэмтэлтэй, эмчилгээ хийгдэж байна. Ар гэртэй нь холбоотой байгаа. Гурван хүүхдийн ээжид хөдөлмөрийн чадвартай болж ажил үүргээ хэвийн гүйцэтгэх хүртэл нь тусламж дэмжлэг үзүүлнэ. Хажуугаар нь гарсан тээврийн хэрэгсэлтэй явсан жолоочид иргэн хүнийхээ үүргээр сэтгэл гаргаагүйд харамсаж байна. 

Дөнгөж сая Даланзадгад сумын удирдлагуудад золбин нохойн устгал хийх, тэжээвэр нохойг өдрийн цагаар уяанд нь байлгах, айл өрхийн үүрэг хариуцлагыг сайжруулах, иргэнийхээ үүргийг биелүүлээгүй иргэнд хариуцлага тооцох зэрэг талаар чиглэл өгч үүрэгжүүллээ гэжээ.