УИХ-ын чуулганы өнөөдрийн /2022.12.02/ хуралдаан эхэллээ. Хуралдаанаар Улсын дээд шүүхийн шүүгчид нэр дэвшигчтэй танилцах асуудлыг хэлэлцэж эхэллээ.

Хэлэлцэж буй асуудалтай холбогдуулан гишүүд нэр дэвшигчдээс асуулт асууж, хариулт авч байна.

УИХ-ын гишүүн Х.Болорчулуун:

-Шүүх ард түмний итгэлийг алдаж ирсэн. Жижгээсээ эхлээд том хэргэм цолтой шүүгчид бүгд шахуу авлига, аливаа бүтэхгүй зүйлд холбогдсон нь саяхны хэрэг. УДШ-ийн шүүгч нарыг сайтар шалгах нь УИХ-ын бүрэн эрх. Та нар мундаг сургууль төгсөж. Гэхдээ шударга зан байдал өвлөгдөж, удамшиж ирдэг. Ямар ч сургууль төгссөн энэ зан байдлыг өөрчилж чадахгүй. Төрөлхийн зөв хүмүүс л дээд шүүхэд ажиллаасай. Тэгж байж олон түмний итгэлийг авна.

Хүний ажил амьдралтай холбоотой эцсийн шийдвэрийг дээд шүүхийн шүүгч л гаргадаг. Орон нутагт ажиллаж байсан нөгөө хоёр шүүгчээс асуух зүйл алга. Харин тэр нийт 14 жил, түүнээс Нийслэлийн шүүхэд арван жил ажилласан М.Пүрэвсүрэн гэж шүүгч болох бүтэхгүй юманд бага л холбогдсон байгаасай гэж залбирч байна. Нийслэлийн шүүхэд ажиллана гэдэг бол их ч зүйлд холбогдсон байгаа даа. Нэг компанийн хэргийг арван жил шүүгээд, эзэн холбогдогч нь нас бараад, энэ жил л шийдэгдэж байна. Иймэрхүү асуудалд холбогдож байгаагүй гэсэн баталгаа байна уу. 

УДШ-ийн шүүгчид нэр дэвшигч М.Пүрэвсүрэн:

-Би шүүгчээр томилогдож ажилласнаас хойш ёс зүйн ямар нэг асуудалд холбогдож байгаагүй гэв. 

---