Хуситууд Саудын Арабын өмнөд хэсэгт пуужин, дроноор цохилт өгчээ
Ираныг дэмжигч Йемений хусит зэвсэгт бүлэглэл Саудын Арабын өмнөд хэсэгт байрлах Хаан Халидын агаарын цэргийн бааз руу олон арван пуужин, нисгэгчгүй онгоцоор цохилт өгчээ.
Дайралтын улмаас 13 энгийн иргэн шархадсан байна. Даваа гарагт болсон уг халдлага Хамис Мушайт хот дахь цэргийн баазыг онилсон бөгөөд нисэх онгоцны ангар, радарын систем, нисэх зурвас болон зэвсгийн агуулахыг бай болгосон гэж хуситууд мэдэгджээ.
Үүний дараа Саудын Арабын иргэний хамгаалалтын байгууллага Хамис Мушайт, Абха, Нажран зэрэг өмнөд бүсийн хотуудад аюулгүй байдлын сэрэмжлүүлэг гаргасан байна. Хуситууд уг довтолгоог Йеменд явуулж буй Саудын Араб тэргүүтэй эвслийн цэргийн ажиллагааны хариу арга хэмжээ гэж тайлбарлажээ. Үүний хариуд Саудын Араб тэргүүтэй эвслийн болон Йемений засгийн газрын хүчний онгоцууд Улаан тэнгисийн эрэг дэх Моха боомт орчмын хуситуудын байрлалд агаарын цохилт өгсөн байна.
Хуситуудын мэдээллийн хэрэгслүүдийн мэдээлснээр, 24 цагийн хугацаанд тус бүсэд 54 удаа агаарын цохилт хийжээ. Мөн Таиз мужид гүүр агаарын цохилтод өртөж, хоёр энгийн иргэн амиа алдсан байна. Түүнчлэн Йемений баруун хэсэгт хуситуудын пуужингийн дайралтын улмаас олон улсад хүлээн зөвшөөрөгдсөн Йемений засгийн газрын найман цэрэг амиа алдсан гэж мэдээлжээ. Энэ үеэр Персийн булангийн Арабын орнууд болон Ираны хооронд Оман улсад хийхээр төлөвлөж байсан усан замын аюулгүй байдлын талаарх хэлэлцээг хойшлуулсан байна. Оманы Гадаад хэргийн сайд хэлэлцээг хойшлуулсан нь талуудын хооронд зөвшилцөлд хүрэх нөхцөл бүрдүүлэх зорилготой гэж мэдэгджээ.
Мөн хуситууд Улаан тэнгисийн Баб-эль-Мандебын хоолойн ойролцоох Перим арлыг хяналтдаа авч, эрэг орчмын байрлалаа бэхжүүлж байгаа гэх мэдээлэл гарсан байна. Үүний зэрэгцээ Саудын Арабын Зүүн-Баруун чиглэлийн 1200 орчим километр урт газрын тос дамжуулах хоолой агаарын цохилтын улмаас ажиллагаагаа зогсоосон гэх мэдээлэл байна. Уг хоолой нь Саудын Арабын газрын тосыг Улаан тэнгисийн эрэг хүртэл тээвэрлэдэг гол шугамуудын нэг юм.
Эх сурвалж:
•
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.