🔴Н.Алтанхуяг: Засаг огцруулах нь эрх баригчдын хийж байгаа ажил. Ерөнхийлөгчид нэр дэвших асуудлаа ярихгүй. Цагаан хэл ам хүрчихнэ

УИХ-ын гишүүн Н.Алтанхуяг Засгийн газрыг огцруулах шаардлага, парламентын үйл ажиллагаа болон өөртэй нь холбоотой шүүхийн асуудлаар байр сууриа илэрхийллээ.

Тэрбээр Засгийн газрыг огцруулах асуудлыг хэн ч санаачилж болох Үндсэн хуулийн эрхтэй бөгөөд түүхэндээ ихэвчлэн цөөнх санаачилж ирснийг сануулав. Түүний хэлснээр, Ардчилсан нам хийх ажилгүй дээ бус, бодит байдал дээр ард түмний амьжиргаа доройтож, бараа бүтээгдэхүүний үнэ өсөж, асуудал үүссэн учраас уг асуудлыг хөндөж байгаа аж. Гэтэл эрх баригчид ард түмний амьжиргааг сайжруулахад анхаарахын оронд амин хувийн эрх ашиг, сандал суудлын хэрүүл хийж сууж байгаад харамсаж буйгаа илэрхийллээ.

Н.Алтанхуяг гишүүн өөрийн тэргүүлсэн Засгийн газрын үеийг жишээ татан, "Миний үед МАН-ын бүлэг огцруулах санал тавихад бид гоншигнож байсангүй. Тавих ёстой асуудлаа тавиад л явдаг жамтай. Харин огцруулах, эсэхийг олонх буюу одоогийн 70 орчим суудалтай МАН өөрсдөө шийднэ. Тэд юундаа сандарч тэвдээд байгаа юм бэ? Ард түмний амьдрал сайхан байна гэж үзвэл Засгийн газраа аваад л үлдэнэ биз. Харин АН-ыг буруутгах хэрэггүй. Хэрэв олонх Засгийн газраа авч үлдвэл ажлаа олигтойхон хий гэсэн үүрэг хариуцлага давхар ноогдож байна гэсэн үг" хэмээн тодотгов.

Мөн тэрбээр улс орон урагшлах бус ухарч буй шалтгааныг МАН ажлаа хийхгүй, хоорондын наймаа, явцуу эрх ашгийн хэрүүл хийж буйтай холбон тайлбарлалаа. "Өнөөдөр инфляц, үнийн өсөлт 13 хувьд хүрчихлээ. Хавар гэнэт л цочсон мэт гарч ирээд '2500 тонн мах хаашаа алга болов' гэх мэтээр барьц алдаж байсан. Ийм хариуцлагагүй байдал гаргаж байгаа учраас манай бүлэг Засгийн газрыг огцруулах нь зүйтэй гэсэн шийдэлд хүрсэн" гэв.

Засгийн газрыг огцруулах бичгийг өргөн барих хугацаа болон Ерөнхий сайдад өөртөө итгэл үзүүлэх тогтоолын төслөө өргөн барих шаардлага тавьсантай холбоотой техникийн асуудлуудын тухайд тэрбээр дараах хариултыг өглөө. "Бичигт гарын үсэг зурсан гишүүний хувьд өргөн барьсан л гэж ойлгож байгаа. Наадмын өдрүүд таарсан ч удахгүй албан ёсоор өргөн барих байх. Гол нь баруун, зүүн тийш харах тухай процессын асуудал биш. Өнөөдөр ард иргэдийн ахуй амьдрал ямар байна, аж ахуйн нэгжүүд татварын дарамтад сөхөрч байна уу үгүй юү, төгрөгийн ханш яаж унав, бараа бүтээгдэхүүний үнэ өсөв үү гэдгийг л ярих ёстой" гэлээ.

Түүнчлэн АН-ын дарга О.Цогтгэрэлийг удааширч, намыг эвгүй байдалд оруулж байна гэсэн шүүмжлэлийн талаар "Энэ бол ганц Цогтгэрэлийн асуудал биш, манай АН-ын 42 гишүүний асуудал. Бараг 40 гаруй гишүүн гарын үсгээ зурсан. 'Алтанхуяг уншихгүйгээр гарын үсэг зурсан' гэх мэтээр дэмий ярьж байгаа хүмүүс бий. Бид бүрэн ухамсарлаж гарын үсгээ зурсан" гэсэн хариулт өгсөн юм.

Төгсгөлд нь, Ерөнхийлөгчийн сонгуулийн чансаагаар өндөр үзүүлэлттэй гарч байгаа болон түүнийг шүүхээр гацаах оролдлого гарч болзошгүй гэх сэдвийн хүрээнд өөрийн байр суурийг илэрхийлэв. Н.Алтанхуяг гишүүн хэлэхдээ, "Эрүүл нийгэм, хууль шүүхтэй улс юм бол анхан болон давж заалдах шатны шүүхээс намайг гэм буруугүйг тогтоож, цагаатгасан. Намайг УИХ-ын гишүүний бүрэн эрхтэй байхад шүүхээр явлаа гэж шүүмжилдэг ч би ард түмэндээ гэм буруугүй гэдгээ нотлохын тулд 4 жил шүүхээр явсан. Гурван удаагийн шүүхээр буруугүй нь тогтоогдсон" гэв.

Харин хэргийг дахин дахин буцааж буй явдлын цаана улс төрийн захиалга, айдас, эсвэл Ерөнхийлөгчид нэр дэвшүүлэхгүй гэсэн барьцаа шантааж явагдаж байна гэж хардаж буйгаа тэрбээр нуусангүй. "Б.Энхбаяр, Б.Пүрэвдорж, Ц.Сандаг-Очир нарын гишүүдийн санаачилж батлуулсан хуулиар хэргийг шүүхээс буцааж дахин дахин явуулдгийг хязгаарласан. Шүүх цагаатгасаар байхад Дээд шүүх болон дунд шатны шүүх буцаагаад байгаа нь захиалгатай гэж хардахаас өөр аргагүй" хэмээн ярилаа.