Украины Ерөнхийлөгч Владимир Зеленский НҮБ-ын цаг уурын асуудлаарх дээд хэмжээний уулзалтын үеэр тус улсын нутаг дэвсгэр дэх ОХУ-ын түрэмгийллийг зогсоохгүй бол дэлхийн уур амьсгалын хямралыг даван туулах боломжгүй гэж мэдэгджээ.

Тэрээр өнгөрөгч мягмар гарагт Египетэд болсон "Cop27" дээд хэмжээний уулзалтад цахимаар үг хэлэхдээ "Энх тайвангүйгээр цаг уурын үр дүнтэй бодлогыг хэрэгжүүлэх боломжгүй. Оросын түрэмгийллээс үүдэлтэй эрчим хүчний хямралын улмаас олон арван улс орон нүүрсний хэрэглээгээ сэргээхэд хүрсэн" гэж тэмдэглэсэн байна.

Түүнчлэн, Украин дахь дайн нь зөвхөн нэг улсын биш, дэлхий дахины асуудал гэдгийг ноён Зеленский онцлоод "Дайны улмаас дэлхий даяар хүнсний хурц хямрал үүссэн ба энэ нь уур амьсгалын өөрчлөлтөөс болж зовж шаналж буй хүмүүст хамгийн ихээр нөлөөлж байгаа" хэмээжээ. Тэрээр мөн Оросын түрэмгийлэгчид сүүлийн зургаан сар хүрэхгүй хугацаанд Украины хоёр сая га ой модыг устгасан гэдгийг хэлсэн байна.

Шарм-эль-Шейх хотод өрнөж буй тус арга хэмжээнд төр, засгийн 100 гаруй тэргүүн болон 45 мянган төлөөлөгч цуглараад байгаа ч ОХУ-ын Ерөнхийлөгч Владимир Путин оролцоогүй юм. "Cop27" дээд хэмжээний уулзалтын хүрээнд ядуу буурай орнууд уур амьсгалын өөрчлөлтөөс үүдэлтэй цаг агаарын эрс тэс нөлөөг даван туулахын тулд хөгжингүй орнуудаас илүү их санхүүгийн тусламж хүсэж байгаа ба хэлэлцээр ирэх хоёр долоо хоногийн турш үргэлжилж, тохиролцоонд хүрэх төлөвтэй байна.

Эх сурвалж: The Guardian

---