ОХУ-ын Ерөнхийлөгч Владимир Путин Украины Херсон, Запорожье мужууд болон Бүгд Найрамдах Донецк Ард Улс, Бүгд Найрамдах Луганск Ард Улсыг ОХУ-д нэгтгээд байгаа билээ. Тэгвэл Украины Ерөнхийлөгч Владимир Зеленский НАТО-д "түргэвчилсэн" байдлаар элсэх хүсэлтээ албан ёсоор гаргаж буйгаа зарлажээ.

Тэрээр энэ талаар "Бид НАТО-д аль хэдийн де-факто байдлаар элссэн. Бид тус цэргийн эвслийн стандартад нийцэж буйг де-факто байдлаар нотолсон. Бид бие биедээ итгэж, бие биедээ тусалж, бие биеэ хамгаалж байгаа. Энэ бол эвсэл. Де-факто. Харин өнөөдөр Украин үүнийг де-юре болгохоор хүсэлт гаргаж байна" гэжээ.

НАТО-д элсэх албан ёсны өргөдөлд Ерөнхийлөгч Зеленскийгээс гадна Украины Парламентын дарга Руслан Стефанчук, Ерөнхий сайд Денис Шмигаль нар гарын үсэг зурсан байна.

Гэвч Украин дайны байдалтай байхад НАТО-д элсэх хүсэлтийг нь тус эвслийн зүгээс хүлээж авах магадлал бага. Энэхүү шийдвэрийг НАТО-гийн бүх гишүүн орон зөвшөөрөх шаардлагатайгаас гадна хэрэв Украин албан ёсны гишүүн болбол тус цэргийн эвсэл бүхэлдээ Оросын эсрэг идэвхтэй тэмцэх шаардлагатай болох бөгөөд энэ нь тэдний хүчин чадлаас давсан хэрэг гэж шинжээчид үзэж байна.

Эх сурвалж: The Guardian

---