БИЧЛЭГ: В.Путин цэргүүдээ Украйны зүүн хэсэгт нэвтрэхийг тушаажээ

ОХУ-ын Ерөнхийлөгч Владимир Путин Украйны зүүн хэсгийн Донецк, Луганск хэсгүүдийн тусгаар тогтнолыг хүлээн зөвшөөрч, эдгээр салан тусгаарласан бүс нутагт цэргээ оруулахыг тушаажээ.

Өөрсдийгөө Бүгд Найрамдах Донецк Ард Улс, Бүгд Найрамдах Луганск Ард Улс гэж тунхагласан салан тусгаарлагчдын удирдагчид Ерөнхийлөгч Путинтай нэгдэн, тусгаар тогтнолыг хүлээн зөвшөөрсөн зарлигт гарын үсэг зурж, хамтын ажиллагаа, найрамдлын гэрээ байгуулж байгааг Оросын төрийн телевизээр харуулсан байна. Ингээд эдгээр бүсэд "энх тайван байдлыг сахиулах" зорилгоор цэргийн хүчээ илгээхийг Оросын Батлан ​​хамгаалах яаманд даатгасан аж.

Үүнээс хойш, ОХУ-ын дэмжлэгтэй салан тусгаарлагчдын хяналтад байдаг Донецк хотоор танк болон цэргийн бусад техник явж байгааг "Ройтерс" агентлагийн төлөөлөгч харжээ. Путины илгээсэн цэргийн хүчний талаар тодорхой мэдээлэл гараагүй байгаа ч Орос улс Украйны салан тусгаарласан хэсэгт цэргийн бааз байгуулах эрхтэй болсон гэнэ.

Ерөнхийлөгч Владимир Путин энэхүү шийдвэрийнхээ талаар ард түмэндээ мэдэгдэхдээ, Украйныг Оросын түүхийн салшгүй нэг хэсэг хэмээн тодорхойлоод, зүүн хэсгийг нь эртний Оросын газар нутаг байсан гэжээ. Харин Украйны Ерөнхийлөгч Владимир Зеленский ард түмэндээ хандаж хэлсэн үгэндээ ОХУ энхийн хэлэлцээг сүйрүүлсэн гэж буруушаасан бөгөөд газар нутгаа хүлээлгэн өгөхгүй гэж мэдэгдсэн юм.

Энэхүү алхам нь томоохон дайн дэгдээж магадгүй гэж Барууны орнууд эмээж байгаа бөгөөд АНУ болон Европын орнууд шинэ хориг арга хэмжээ авахаар төлөвлөж байна. Францын Ерөнхийлөгч Эммануэль Макрон, Германы Канцлер Олаф Шольц ба АНУ-ын Ерөнхийлөгч Жо Байден нар Донецк, Луганск бүс нутгуудад АНУ-ын бизнесийн бүх үйл ажиллагааг зогсоож, импортыг бүхэлд нь хориглох тушаалд хамтран гарын үсэг зуржээ.

Эх сурвалж: Reuters