Нийслэлийн онцгой комиссоос цар тахлын нөхцөл байдал, эмнэлгийн орны хүрэлцээ, авч хэрэгжүүлж байгаа хариу арга хэмжээний талаар мэдээлэл өгч байна.

НЭМГ-ын дарга Б.Бямбадорж: 

-КОВИД-19 халдвараар эмнэлэгт хэвтэн эмчлүүлж буй хүмүүсийн дунд хүнд болон нэн хүнд хүмүүсийн эзлэх хувийн жин нэмэгдэж байна. Эрсдэлтэй, зайлшгүй, цаашид эмнэлэгт хэвтэн эмчлүүлэх шаардлагатай хүмүүс эмнэлэгт 18 хувийг эзэлж байгаа.

Хүнд болон нэн хүнд хүмүүсийн эмнэлэгт эзлэх хувийн жин нэмэгдэх хандлагатай байна. Гуравдугаар тунгийн дархлаажуулалт сүүлийн долоо хоногт нэмэгдэх хандлагатай байгаа нь сайн үзүүлэлт юм. 

Иргэдийн нэмэлт тунгийн дархлаажуулалтад хамрагдах нь нэмэгдсэн. Нэмэлт дархлаажуулалтын хүртээмжийг нэмэх арга хэмжээг авч байна. Ковид-19-тэй зэрэгцэн улирлын томуугийн дэгдэлт байгаа. Хүүхдүүдийг томуугийн эсрэг вакцинжуулалтад хамруулсан. Мөн жирэмсэн эхчүүдийн вакцинд хамруулсан.

Амралтын өдрүүдэд оюутны байранд очиж, дархлаажуулалтыг хийж байна. Энэ үйл ажиллагаанд оюутнуудыг идэвхтэй оролцохыг урьж байна.

Ням гарагт вакцинжуулалт хийхгүй. Иргэд даваагаас бямба гараг хүртэл иргэд өөрт ойрхон цэг дээрээ очиж вакцинаа хийлгээрэй. Хоёр долоо хоногийн өмнөөс эмнэлгүүдэд ор зохилцуулалтын багийг ажиллуулж эхэлсэн. Өчигдрийн байдлаар 511 иргэнийг эмнэлэгт хэвтэх шаардлагатай гэж үзсэнээс нийт 485 хүнийг эмнэлэгт хэвтүүлсэн байна. Үлдсэн иргэд хэвтэх төлөвлөгөөнд ороод хүлээж байна.

Сүүлийн 24 цагт цэцэрлэгээс 11 хүүхэд, 17 багш, 9 ажилтан, ЕБС-иас 117 сурагч, 43 багш, 7 ажилтан халдвар авсан нь батлагдсан байна. Бүрэн цахимд шилжсэн сургууль нэг, цэцэрлэг нэг байна. Түүнчлэн хагас цахим шилжсэн сургууль, цэцэрлэг мөн нэг нэг байна гэв.

---