БНСУ-ын дуучин эмэгтэй хар тамхи хэрэглэсэн хэргээр баривчлагджээ
Өмнөд Солонгосын Чүнчон хотын цагдаа нар мансууруулах бодис хууль бусаар тээвэрлэж, худалдаалсан хэргээр 14 хүнийг баривчилсан ба харин хар тамхи хэрэглэсэн хэргээр дөрвөн хүнийг баривчилсан гэж мэдээлжээ. Эдгээр дөрвөн хүний дунд Эйми гэх нэртэй дуучин, телевизийн алдартан багтаж байгаа аж.
Гангвоны Цагдаагийн газрын таслан зогсоосон хар тамхины наймааны бүлэглэл нь Вьетнам, Филиппин болон бусад улсаас мансууруулах бодис оруулж ирэн, Өмнөд Солонгосын иргэдэд түгээж байжээ. Хэрэгтнүүд ихэнхдээ олон улсын агаарын шуудангаар бараагаа авч, "Telegram" мессенжерийн платформыг ашиглан байнгын үйлчлүүлэгчдээ худалдаалдаг байсан гэнэ.
Цагдаа нар гаалийн байгууллагатай хамтарсан ажиллагаа явуулсны үр дүнд 6.2 кг метамфетамин, 791 грамм кетамин, 2.1 кг синтетик каннабиноид, 1,344 экстаси эм, 167 гр марихуан болон 47 сая воны бэлэн мөнгийг хураан авсан байна. Эдгээр хар тамхи нь нийт 21.9 тэрбум воны үнэд хүрэх бөгөөд 214 мянган хүн ашиглах боломжтой аж.
Албаныхан тус хар тамхины наймааны бүлэглэлийн 37 үйлчлүүлэгчийг саатуулснаас дөрвийг нь албан ёсоор баривчилсан байна. Эйми буюу И Юн Жигийн хэргийг аль хэдийн прокурорт шилжүүлсэн гэж цагдаагийн газраас мэдээлсэн юм. Уг дуучин эмэгтэй өмнө нь 2012 болон 2014 онуудад мөн хар тамхи хэрэглэсэн хэргээр шийтгэл хүлээж байжээ.
Эх сурвалж: Yonhap News Agency
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.