Цаазын ял гүйцэтгэж байсан шоронгийн дарга яагаад уг шийтгэлийг хүчтэй эсэргүүцэгч болов?
АНУ-ын Флорида муж улсын шоронгийн дарга асан Рон Макэндрю цаазын ял гүйцэтгэх ажиллагааг олон удаа удирдан явуулсныхаа дараа сэтгэцийн хүнд дарамтад орж, улмаар цаазаар авах ялыг бүрмөсөн цуцлахын төлөө тууштай тэмцэгч болсон тухай CNN агентлаг мэдээллээ.
Шоронгийн албанаас буусны дараа Макэндрюг цаазалсан ялтнуудынх нь дүр төрх сэтгэл зүйд нь мөнхийн дарамт учруулж, тайван амьдрах боломжгүй болсон байна. Түүний өгүүлснээр цаазлуулсан хүмүүсийн нэг нь шөнө бүр орны хөлд суун, хоосон харцаар ширтэж байх шиг хий төсөөлөл байнга зовоож байгаа аж. Энэхүү сэтгэцийн хүнд цочрол нь 1997 онд Педро Медина хэмээх хоригдлыг цахилгаан сандал дээр суулган цаазлах явцад алдаа гарснаас эхлэлтэй бөгөөд Рон Макэндрю үүнээс үүдэн гэмтлийн дараах стрессийн эмгэг буюу PTSD-тэй бүтэн 13 жил зовсон байна.
Сэтгэл санааны хүнд дарамт, шаналлыг биеэр туулсан тэрбээр тэтгэвэрт гарсныхаа дараа цаазаар авах шийтгэлийг хориглох үйлсэд дуу хоолойгоо өргөх болжээ.
Цаазын ял нь зөвхөн ялтанд бус, тушаал гүйцэтгэж буй хорих байгууллагын ажилтнуудын сэтгэцэд нөхөж баршгүй гүн шарх үлдээдэг тул энэхүү хэрцгий арга хэмжээг нэн даруй бүрмөсөн зогсоох шаардлагатай гэж тэрбээр олон нийтэд уриалж байна.
Сэтгүүлч Роб Пичетагийн бэлтгэсэн нийтлэл болон Дэвид Риндийн хөтлөн явуулсан "CNN 5 Things" аудио нэвтрүүлэгт онцолсноор, АНУ даяар цаазаар авах ялын хэрэглээ болон уг арга хэмжээг дэмжих хандлага аажмаар буурч байгаа ажээ. Гэсэн хэдий ч Флорида муж улс цаазын ялыг тогтмол гүйцэтгэсээр буй тэргүүлэгч мужуудын тоонд байсаар байгаа нь уг тогтолцооны сөрөг нөлөөллийн талаарх шүүмжлэлийг дахин хөндөхөд хүргэж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.