АНУ-ын Атланта хотын амьтны хүрээлэнд БНХАУ-аас хоёр хулсны баавгай ирлээ
БНХАУ-ын Сычуань мужийн Чэндү хотоос тээвэрлэсэн Пин Пин болон Фү Шуан нэртэй хоёр аварга хулсны баавгай АНУ-ын Жоржиа муж улсын Атланта хотын амьтны хүрээлэнд газардлаа. Амьтан хамгааллын салбарт хамтран ажиллах 10 жилийн хугацаатай гэрээний хүрээнд ирж буй тус хулсны баавгайнуудыг тусгайлан тоноглосон нисэх онгоцоор тээвэрлэн авчирсан бөгөөд 2026 оны есдүгээр сарын 27-ны ням гаргийн өглөө Хартсфилд-Жэксон олон улсын нисэх буудалд буусан байна.
Эдгээр хулсны баавгайнууд нь Чэндү хотын Аварга хулсны баавгай үржүүлэг, судалгааны баазад мэндэлжээ. 2020 оны гуравдугаар сарын 17-нд төрсөн эрэгчин баавгайг Пин Пин гэдэг бөгөөд түүний нэр нь амар амгалан, эрүүл энх амьдралыг бэлгэддэг байна. Харин 2020 оны аравдугаар сарын 18-нд төрсөн эмэгчин баавгайг давхар аз жаргал гэсэн утга бүхий Фү Шуан гэж нэрлэжээ. Нислэгийн туршид амьтдад шинэхэн хулс, хулсны нахиа, алим зэрэг шаардлагатай шим тэжээлийг өгч, малын эмч болон мэргэжлийн асран хамгаалагчдын баг биеийн байдлыг нь тасралтгүй хянажээ.
Амьтан хамгааллын энэхүү тохиролцоог анх 2026 оны дөрөвдүгээр сард танилцуулж байсан бол баавгайнууд АНУ-д ирэх нарийвчилсан хугацааг БНХАУ-ын дарга Ши Жиньпин АНУ-ын Ерөнхийлөгч Дональд Трамптай хийсэн дээд хэмжээний уулзалт, төрийн айлчлалынхаа үеэр албан ёсоор баталгаажуулсан билээ.
Одоогоор Пин Пин, Фү Шуан нар Атлантагийн амьтны хүрээлэнгийн хулсны баавгайн цогцолбор дахь био аюулгүй байдлын тусгай бүсэд байрлаад байна. Шинэ орчиндоо дасан зохицох зорилгоор тэд ойролцоогоор нэг сарын хугацаанд хөл хорионы дэглэмд байх тул олон нийтэд хараахан үзүүлэхгүй юм.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.