ИРГЭДИЙН ЦАГ: Цахим орчинд үзэл бодлоо илэрхийлээд 500 мянган төгрөгөөр торгуулжээ

Цар тахалтай холбоотойгоор гамшгаас хамгаалах тухай хуулиар иргэн хуулийн этгээдийг олон нийтийг төөрөгдүүлэх, худал мэдээ мэдээлэл түгээсэн гэж үзвэл 500 мянган төгрөгөөр торгож байна. Иргэдийн цаг нэвтрүүлгийн энэ удаагийн дугаараар иргэдийн үг хэлэх, үзэл бодлоо илэрхийлэх эрх чөлөөнд халдаж байгаа асуудлын талаар хүргэж байна.

Олон нийтийн сүлжээнд үзэл бодлоо илэрхийлсний төлөө нэгэн иргэнийг 500,000 төгрөгөөр торгожээ.

Монгол Улсын Үндсэн хуулийн 16 дугаар зүйлийн 16-д Монгол Улсын иргэн нь “итгэл үнэмшилтэй байх, үзэл бодлоо чөлөөтэй илэрхийлэх, үг хэлэх, хэвлэн нийтлэх, тайван жагсаал, цуглаан хийх эрх чөлөөтэй. Жагсаал, цуглаан хийх журмыг хуулиар тогтооно” гэж заасан байдаг.
Гэтэл Зөрчлийн тухай хууль мөрдөгдөж эхэлсэн цагаас иргэд энэ эрхээ хэрэгжүүлж чадахгүй нөхцөл байдалд ороод байна.