Сингапурын цагдаагийн ажилтны эхнэр Мьянмараас ирсэн гэрийн үйлчлэгчийн амь насыг хэрцгийгээр хороосон гэдгээ хүлээн зөвшөөрчээ. Хэрэгтэн үйлчлэгч эмэгтэйг хоол өгөлгүй өлсгөж, зодож нүдэн харгис хандсан хэргээ хүлээсэн байна.

Уг хэрэг 2016 онд гарсан бөгөөд үйлчлэгч эмэгтэйн цогцсыг олоход ердөө 24 кг жинтэй байжээ. Мягмар гарагт Сингапурын шүүх хэрэгтэн Гайятхири Муругаяныг 28 зүйл ангийн хэрэгт гэм буруутайд тооцож, прокурорууд түүнийг хүнлэг бус, чөтгөр шулмын үйлдэл гаргасан хэмээн буруутгажээ.

Хэрэв гэм буруутайг нь шүүхээр эцэслэн баталвал 40 настай эмэгтэйг Мьянмарын иргэн Пиан Нгай Доны амь насыг хэрцгийгээр хороосных нь төлөө ялын дээд хэмжээ буюу бүх насаар нь хорих ял онооно.

Ойрын жилүүдэд өндөр хөгжилтэй, чинээлэг Сингапур улсад гэрийн үйлчлэгчдэд хэрцгий хандаж, хүчирхийлсэн хэргүүд олон гарах болсон. Хүний эрхийн байгууллагууд Азийн хөрш орнуудаас ирж буй гэрийн үйлчлэгчдийн эрхийг хамгаалах тал дээр анхаарал хандуулахыг эрх баригчдаас хүсч байна.

Хохирогч Пиан нь Гайятхиригийн гэрт 2015 онд ажилд оржээ. Тэрээр анх удаа гадны улсад цагаачлан ажилд орсон нь байв. 2015 оны аравдугаар сараас Пианыг удаан хөдөлгөөнтэй, хэтэрхий их иддэг, бохир заваан хэмээн гэрийн эзэгтэй дарамтлах болжээ. Гэмт этгээдийн гэрт байрлуулсан хяналтын камеруудын бичлэгт хохирогчийн амьдралын сүүлийн нэг сарын хугацаанд түүнийг өдөрт хэд хэдэн удаа дайрч доромжилж байгаа нь бичигдсэн байна. Мөн түүнийг халуун индүүгээр түлж, хүйтэн хоол, зүсэм талхыг усанд норгон өгдөг байжээ. Жил хоёр сарын хугацаанд хохирогч 15 кг буюу биеийн жингийнхээ 40 хувийг алджээ.

24 настай залуу бүсгүй 2016 оны долдугаар сард удаа дараа Гайятхири болон ээжид нь зодуулсны дараа нас барсан байна. Задлан шинжилгээгээр Пиан удаа дараа зодуулж доргисноос болж тархинд нь хүчилтөрөгч дутагдан нас барсан болохыг нь тогтоожээ.

Гайятхиригийн өмгөөлөгчид сэтгэл санааны хямрал, хувийн зан үйлийн эмгэг өвчтэй тул үйлчлүүлэгчид нь оноосон ялын дээд хэмжээг бууруулах хүсэлт тавьсан байна. Түүний нөхөр Келвин Челвамыг уг хэрэг гарсны дараа үүрэгт ажлаас нь чөлөөлжээ.

Эх сурвалж: ВВС

---