Нийслэлийн Засаг дарга Д.Сумъяабазар "Нэг хаалга-Нэг шинжилгээ" арга хэмжээний явцын талаар мэдээлэл өглөө.
Тэрбээр “Улаанбаатар хотод зохион байгуулж буй "Нэг хаалга-Нэг шинжилгээ" арга хэмжээг өргөн хүрээнд, зохион байгуулалттайгаар ажиллаж байна. Иргэд PCR шинжилгээнд хамрагдах идэвх сайн байна. Бид ажиллах хүчээ тооцоолж, бүрэн хүчин чадлаараа ажиллаж байгаа ч  нэг өрхөөс давхардаж шинжилгээ өгөх тохиолдлууд гарч байгаа. 

Нийслэлийн онцгой комиссын Шуурхай штабын Орон зай дүн шинжилгээны багийн мэргэжилтнүүд өнгөрсөн хугацаанд хийсэн шинжилгээнүүдийн батлагдсан тохиолдлуудыг нэгтгэн судалсан. Улмаар халдварын шинэ голомт үүсэж болзошгүй байршлуудыг нарийвчлан хороо тус бүрээр гаргасан.

Баянзүрх дүүрэгт Улаанхуаранд халдварын тархалт ихсэх тооцоог гаргасан. Шинжилгээгээр батлагдсан тохиолдлуудын хавьтлыг тодорхойлох, шинэ голомт үүсэж болзошгүй байршлуудын тооцооллыг технологийн дэвшил ашиглан гаргасан. Уг мэдээллүүдийг нэгтгэн УОК-ын шуурхай штабт танилцуулна. 

Нийслэлийн өрх бүрийг шинжилгээнд хамруулсны дараа вакцинжуулалтын ажил эхлэх бөгөөд Улаанбаатар хот, бусад дүүргүүдийн хувьд төр, засгийн зүгээс гаргаж буй шийдвэр, үүрэг чиглэлийг биелүүлэх арга туршлагатай болсон. Гол нь халдварын голомтуудаа хумьж, Улаанбаатар хот нийгэм, эдийн засгийн энгийн амьдралдаа шилжих, бизнесүүдээ дэмжиж, ажлын байрыг хадгалах арга хэмжээг яаралтай авах ёстой гэдгийг мөн онцоллоо. 

Өнөөдрийн байдлаар нийт 448 дуудлага ирсэн байна. Эдгээр дуудлагын 68 хувийг “Нэг хаалга-Нэг шинжилгээ” арга хэмжээтэй холбоотойгоор мэдээлэл авсан байна. 
Нийслэлийн Эрүүл мэндийн газрын дарга Б.Бямбадорж: Чингэлтэй дүүрэгт иргэдээс коронавирусийн шинжилгээ авахаар 61 явуулын, 10 суурин цэг ажиллаж байна. Тус дүүргийн 21,700 өрх айл шинжилгээ өгсөн бөгөөд өнөөдрийн 16:00 цагийн үед бүх шинжилгээг авч дуусна гэдгийг албаны хүн хэллээ.

Маргааш Сүхбаатар дүүргийн иргэдээс коронавирусийн шинжилгээ авах бөгөөд үлдсэн хоёр өдөрт Баянзүрх дүүргийн иргэдээс шинжилгээ авч "Нэг хаалга-Нэг шинжилгээ" арга хэмжээ дуусах юм байна.

---