Халуун сэдэв: Д.Цэнд-Аюуш: QR кодыг иргэд бүртгүүлэхгүй байгаа юм биш ААН-үүд өөрсдөө шаардлага тавих хэрэгтэй

Энэ удаагийн Халуун сэдэв булангийн зочноор QR бүртгэлийн талаар НМХГ-ын ЭМБСХХ-ийн дарга Д.Цэнд-Аюуштай ярилцлаа.

НМХГ-ын ЭМБСХХ-ийн дарга Д.Цэнд-Аюуш: Мэргэжлийн хяналтын байгууллагаас өргөтгөсөн шалгалтыг хийж байгаа. Энэ хүрээнд QR бүртгэл хангалтгүй байгаа ААН-үүдэд шаардлага хүргүүлж, үйл ажиллагааг нь зогсоох хүртэл арга хэмжээ авах юм.

Иргэд QR бүртгэлийг хариуцлагатайгаар тогтмол ашиглах, ААН-үүд үүнд шаардлага тавьж үйлчилж хэвших нь цар тахлаас үүдэлтэй бэлэн байдлын үед бүх нийтийн эрүүл мэндийн аюулгүй байдалд үнэтэй хувь нэмрээ оруулж буй явдал юм. Иймд хамтдаа хариуцлагатай байж, QR бүртгэлийг хэвшил болгохыг ААН, иргэдэд хандан уриалж байна.

Шалгалтаар ажилтан болон үйлчлүүлэгчийн халууныг хэмжиж бүртгэх үйл ажиллагаа хангалтгүй, QR  код буюу бүртгэлийн цэгийг байршуулсан боловч үйлчлүүлэгчдээр уншуулсан байдал хангалтгүй, хүн хоорондын зай бариулаагүй хангалтгүй  зэрэг зөрчлүүд илэрсэн.

Халдвар хамгааллын дэглэм мөрдүүлээгүй, QR код уншуулалт хангалтгүй аж ахуйн нэгжийг Зөрчлийн тухай хуулийн холбогдох заалтаар нэг сая төгрөгийн арга хэмжээ тооцон, мэдэгдэл хүргүүлнэ.

QR кодыг иргэд бүртгүүлэхгүй байгаа юм биш ААН-үүд өөрсдөө шаардлага тавих хэрэгтэй. Иргэд үүргээ биелүүлэн үйлчлүүлсэн байгууллага бүрд QR бүртгэлийг хийлгэх ёстой.