АНУ-ын Конгрессийн танхим байрладаг түүхэн барилга Капитол Хилл рүү өнгөрсөн долоо хоногт жагсагчид дайран орсны дараа Facebook болон Twitter цахим хуудсууд Ерөнхийлөгч Дональд Трампын хаягийг тодорхойгүй хугацаагаар хаагаад байгаа. YouTube платформ Ерөнхийлөгч Трампын сувгийг хаагаагүй байсан бол даган мөрдөх ёстой дүрэм журмыг зөрчсөн гэж үзэн долоо хоногийн хугацаатай хаах шийдвэрийг гаргажээ.

Трампын YouTube суваг хүчирхийллийг өдөөн хатгасан гэж үзсэн тул түүний сүүлд оруулсан бичлэгийг устгаж, сувгийг нь хаасан байна. Дүрмийн дагуу Трампын YouTube суваг багадаа долоо хоногийн турш шинээр видео бичлэг байршуулах болон шууд дамжуулалт хийх эрхгүй боллоо. Мөн Трампын сувагт байршуулсан бичлэгүүдэд коммент үлдээхийг хориглосон байна.

Хэрэв хоёр дахь удаагаа Трампын суваг дүрэм зөрчсөн гэж үзвэл хоёр долоо хоногийн хугацаатай хаах бөгөөд гурав дахь удаагаа платформын дотоод бодлого зөрчсөн тохиолдолд сувгийг нь бүрмөсөн хаах ажээ.

Эх сурвалж: CNN

---