Төв аймгийн IV сургуулийн захирал Ө.Дуламсүрэн өөрийгөө "Хөдөлмөрийн аварга"-аар өргөмжлөн шагнажээ

Төв аймгийн Зуун мод сумын Ерөнхий боловсролын IV сургуулийн захирал Өлзийбилэгийн Дуламсүрэн нь өөрийгөө сургуулийнхаа “Хөдөлмөрийн аварга”-аар өргөмжилж, цалингийн 40 хувиар шагнасан тушаалыг та бүхэн харж байна.

Тэрбээр уг тушаалдаа “Өлзийбилэг овогтой Дуламсүрэн нь 2012 оноос хойш өнөөг хүртэл 10 жил сургуулийн захирлаар ажиллаж, багш, суралцагчид, ажилчдын сурах, хөгжих, ажиллах таатай орчныг бүрдүүлэхэд идэвх санаачлагатай ажилласан” тул “Хөдөлмөрийн аварга” болгосугай хэмээсэн нь шүүмжлэл дагуулж байна.

Ерөнхий боловсролын сургуулийн захирлууд өөрийгөө шилдэг ажилтнаар өргөмжлөн шагнах тохиолдол монголд хавтгайрсан үзэгдэл болоод байгаа.

Тухайлбал, Нийслэлийн ерөнхий боловсролын 28-р сургуулийн захирал Ц.Манахүү гэгч нь “2017 оны шилдэг ажилтан”-аар өөрийгөө өргөмжилж, хүндэт самбарынхаа хамгийн дээд буланд өөрийнхөө зургийг хэвлэж тавьснаасаа болж олон нийтийн шүүмжлэлийн бай болж байсан юм.