"Малыш" Б.Энхтүвшин: Хоёр сарын дараа С.Зориг агсны захиалагчийн нэр тодорно

УИХ-ын гишүүн, дэд бүтцийн сайд С.Зориг 1998 оны аравдугаар сарын 2-нд бусдын гарт хэрцгийгээр амь насаа алдсан. Түүнийг дурсан санаж жил бүрийн энэ өдөр улс төрийн хамтрагчид болон ах дүү төрөл төрөгсөд, найз нөхөд нь хөшөөнд нь цэцэг өргөж хүндэтгэл үзүүлдэг.

Энэ удаад Ардчилсан намын удирдлагууд С.Зориг агсны хөшөөнд хүндэтгэл үзүүллээ.

Анх 2016 онд С.Зоригийн хэрэг илэрсэн тухай хуулийн байгууллагынхан ээлжит мэдэгдлээ хийж, хэрэгт холбогдогч Ц.Амгаланбаатарыг С.Зориг агсны амьдарч байсан байрны 00-ын өрөөнд оруулж байгаад авсан бичлэгийг олон нийтэд үзүүлсэн юм. Түүнээс хойш шүүх ажиллагааг эхлүүлж, Ц.Амгаланбаатар, Б.Содномдаржаа нарт 25 жил, Т.Чимгээд 24 жилийн хорих ял оноосон байдаг. Өөрөөр хэлбэл8 2017 онд бүх шатны шүүх энэ хэргийг эцэслэж яллаж дуусгасан.

Гэвч зарим улс төрчид уг хэргийг улс төрийн зорилгоор ашиглаж, гэмт хэрэгтэн гэж ялласан хүмүүсийг эрүүдэн шүүсэн хэмээн хууль хүчний байгууллагынханыг буруутгаж, хэрэг дахин задарсан билээ. 

ХЗДХ-ийн сайд  асан  Ц.Нямдорж Б.Содномдаржаа, Т.Чимгээ нарыг суллахыг шаардаж, УИХ-ын гишүүн Л.Болд, Ж.Батзандан нарын гишүүд хамтран ажлын хэсэг байгуулж, хэсэг ярьсан. Гэвч  сонгуулийн дараа тэдгээр хүмүүс сонгогдоогүй учраас энэ хэргийг тоох хүнгүй болжээ. 

Энэ талаар Ардчиллын анхдагчдын нэг "Малыш" хочит Б.Энхтүвшин өөрийн байр суурийг илэрхийлээд, С.Зориг агсны амь насыг хөнөөсөн алуурчдын захиалагчийн нэр тун удахгүй буюу хоёр сарын дараа гэхэд тодорно гэлээ.