ОХУ хилээ нээж эхэллээ

ОХУ-ын Ерөнхий сайд Михаил Мишустин иргэдийг ажиллах, сурах, хамаатан саднаа асрах зорилгоор гадаад руу зорчихыг зөвшөөрөх болсноо зарлалаа. Үүнтэй холбогдох журамд Засгийн газар гарын үсгээ зураад байна.

Түүнчлэн, Мишустин бусад улс оронд эмчилгээ хийлгэх шаардлагатай иргэд гадаадад зорчих боломжтой болно гэв. Оросын эмнэлэгт эмчлүүлэхээр төлөвлөж байгаа гадаадын иргэд ч тус улсад нэвтрэх боломжтой болох аж.

Коронавирусийн нөхцөл байдал дээрдсэнээр гуравдугаар сараас хойш тавьсан ОХУ-д нэвтрэх, тус улсаас гарахтай холбоотой хязгаарлалтуудыг Засгийн газраас дахин авч үзсэний эцэст ийм шийдвэрт хүрчээ.

Харин аялал жуулчлалын зорилгоор гадаадад зорчих хүсэлтэй оросуудад тавьсан хязгаарлалт хүчин төгөлдөр хэвээр байгаа бөгөөд ирэх намар хүртэл үргэлжилнэ гэж шинжээчид таамаглаж байна. Тухайлбал, Оросын аялал жуулчлалын операторуудын нийгэмлэгийн гүйцэтгэх захирал Майя Ломидзе ОХУ-аас гадаадад аялах хөтөлбөр зарахыг хориглосон шийдвэр есдүгээр сар хүртэл цуцлагдахгүй байх гэж үзэж байгаа аж.

Үүнтэй төстэй мэдэгдлийг “Ростуризм”-ээс хийсэн байна. Хэлтсийн дарга Зарин Догузова хэлснээр энэ зуны улиралд тус улсад гадаад аялал жуулчлал эхлэхгүй гэнэ.

Эх сурвалж: lenta.ru