Туркэд ижил хүйстнүүдийн эрхийн төлөө тэмцэгчдийг хоморголон баривчлав
Бүгд Найрамдах Турк Улсын хууль сахиулах байгууллагууд тус улсын таван томоохон хотод ЛГБТК+ нийгэмлэг, хүний эрхийн төлөө тэмцэгчид болон тэдний олон нийтийн байруудыг онилсон өргөн цар хүрээтэй тусгай ажиллагаа явуулж, олон тооны идэвхтэнийг баривчилжээ.
“Гэр бүл минь аюулгүй” нэртэй уг нэгдсэн ажиллагаа есдүгээр сарын 13-ны ням гаргийн шөнө Истанбул, Анкара, Измир, Айдын, Мерсин хотод нэгэн зэрэг эхэлсэн байна. Цагдаагийн хүч ЛГБТК+ идэвхтнүүдийн хувийн сууц, ДОХ-ын эсрэг сэрэмжлүүлэг түгээдэг болон өмгөөллийн байгууллагуудын төв байр, шөнийн клуб, баар, халуун усны газар зэрэг нийт 13 аж ахуйн нэгжид нэгжлэг хийжээ. Туркийн Хууль зүйн сайд Акын Гүрлек уг шалгалтын хүрээнд 162 сэжигтэн, есөн холбоо, 13 байгууллагыг шалгаж эхэлснийг албан ёсоор мэдээлсэн бөгөөд эхний ээлжид 47-63 хүнийг баривчлан саатуулсан байна. Мөн хэд хэдэн байгууллагын цахим хуудас, нийгмийн сүлжээний хаягт хандах эрхийг хааж, дижитал хэрэгсэл, галт зэвсэг, мансууруулах бодис зэргийг хураан авчээ.
Хууль зүйн сайд Акын Гүрлек уг ажиллагааг тайлбарлахдаа Үндсэн хуулийн үүрэг болон Ерөнхийлөгч Режеп Тайип Эрдоганы урт хугацааны удирдамжийн хүрээнд "хүүхэд, гэр бүлийн институц болон нийгмийн хэв журам"-ыг хамгаалах зорилготой хэмээн онцолсон байна. Түүнчлэн албаны хүмүүс эдгээр байгууллагууд гадаад орнуудаас санхүүжилт, буцалтгүй тусламж авсан явдлыг шалгалтын бас нэгэн гол шалтгаан болгон заажээ.
Эрх баригчдын энэхүү алхам нь Ерөнхийлөгч Эрдоганы ЛГБТК+ хөдөлгөөнийг эсэргүүцсэн шүүмжлэл, консерватив бодлого болох “Гэр бүлийн арван жил” төсөлтэй шууд уялдаж байгаа аж.
Шөнийн нэгжлэг, баривчилгааг эсэргүүцсэн иргэд есдүгээр сарын 15-ны мягмар гаргийн өдөр Истанбул хотын шүүхийн байр болон бусад олон нийтийн талбайд цуглаан зохион байгуулжээ. Гэвч цагдаагийн байгууллага уг цуглааныг хүчээр тарааж, эсэргүүцэлд оролцсон 150 хүртэлх тооны жагсагчийг нэмж баривчилжээ.
Хүний эрхийн холбоо зэрэг олон улсын болон дотоодын байгууллагууд уг үйл явдлыг иргэний нийгмийн эсрэг чиглэсэн төрийн дарамт шахалт хэмээн буруушааж байна. Европын хууль тогтоогчид болон хүний эрхийн төлөөлөгчид энэ нь Турк дахь цөөнхийн эрхийг хамгаалагчдын эсрэг чиглэсэн ялгаварлан гадуурхалт, хууль эрх зүйн дарамтыг эрс нэмэгдүүлж буй хэрэг хэмээн анхаарууллаа.
Эх сурвалж:
•
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.