Оросын нисгэгчгүй онгоцууд Польшийн хилийн ойролцоо цохилт өгсөн нь НАТО-гийн орнуудыг түгшээв
ОХУ-ын нисгэгчгүй онгоцнууд Украины баруун бүс буюу Польшийн хилээс ердөө хоёр км-ийн зайд цохилт өгсөн нь бүс нутгийн аюулгүй байдлыг эрс хурцатгаж, НАТО-гийн холбоотон орнуудыг өндөржүүлсэн бэлэн байдалд шилжүүлэхэд хүргэлээ.
Энэхүү дайралтын улмаас Киев-Варшавын чиглэлийн зорчигчийн галт тэрэг болон хилийн шалган нэвтрүүлэх боомтын дэд бүтэц өртсөн хэдий ч хүний амь нас эрсдээгүй байна.
Баруун хойд Украины Волын мужийн нутагт, Польшийн хилээс хоёр орчим километрийн зайд явж байсан Киев-Варшав чиглэлийн зорчигчийн галт тэрэгний зүтгүүрийг Оросын дрон оносон байна. Азаар зорчигчдыг урьдчилан нүүлгэн шилжүүлж амжсан тул гэмтэж бэртсэн хүн гараагүй аж. Үүнээс гадна Польшийн хил рүү нэвтрэх Ягодин-Дорохуск боомтоос 800 хүрэхгүй метрийн зайд байрлах шатахуун түгээх станц болон ачааны автомашин дроны цохилтод өртжээ. Шөнийн цагаар Украины нутаг дэвсгэрт нийт 450 гаруй дрон, пуужингаар цохилт өгсний тодорхой хэсэг нь Волын болон Львов мужийн Стрый хотыг чиглэсэн нь Польшийн зүүн хил дагуух бүс нутгуудад агаарын түгшүүр зарлахад хүргэсэн юм.
Украины төмөр зам болон тагнуулын албаныхны үзэж буйгаар энэхүү халдлага нь барууны өндөр албан тушаалтнуудыг онилсон байж болзошгүй байна.
Их Британийн Ерөнхий сайд асан Борис Жонсон, АНУ-ын Тагнуулын төв газрын дарга асан Дэвид Петрэус нар Киев хотноо зохион байгуулагдсан аюулгүй байдлын бага хуралд оролцоод галт тэрэг цохилтод өртөхөөс өмнөхөн Польшийн хилээр гарч амжжээ. Мөн Эстонийн Гадаад хэргийн сайд Маргус Цахкна тэргүүтэй төлөөлөгчид агаарын дайралтын шууд аюулын улмаас Ягодин-Дорохуск боомт дээр түр саатсан байна. Тэрээр Оросын халдлага НАТО болон Европын Холбооны хилд хэт ойрхон зайд туссаныг онцлоод, холбоотнууд хариу арга хэмжээгээ эрс чангатгах шаардлагатайг мэдэгдэв.
Польшийн засгийн газар энэхүү цохилтыг маш ноцтойд тооцож байна. Тус улсын Ерөнхий сайд Дональд Туск аюулгүй байдлын шуурхай хуралдаан хийж, Москвагийн зүгээс НАТО-гийн гишүүн орнуудын хил дагуух ажиллагаагаа идэвхжүүлэх хандлагатай байгааг сэрэмжлүүлэн, зүүн хилийнхээ хамгаалалтыг нэмэгдүүлнэ гэдгээ илэрхийллээ. Польшийн Зэвсэгт хүчний шуурхай командлал агаарын орон зайн ойролцоо бодит аюул нүүрлэснийг тэмдэглэсэн бол Дотоод хэргийн сайд Марчин Кервински хилийн боомтын ойролцоох халдлагад онцгой анхаарал хандуулж байгааг мэдэгдсэн байна. Түүнчлэн Батлан хамгаалахын сайд Владислав Косиняк-Камыш Балтийн тэнгисийн эрэг орчмоос Оросын цэргийн дрон олдсон талаар тусад нь мэдээлэв.
НАТО-гийн Ерөнхий нарийн бичгийн дарга Марк Рютте тус эвслийн нутаг дэвсгэрт хэт ойр цохилт өгч байгаа нь ОХУ-ын Ерөнхийлөгч Владимир Путины цөхрөнгөө барсан, болчимгүй үйлдэл гэж тодорхойлоод Украинд агаарын довтолгооноос хамгаалах зэвсэглэлийн тусламжийг нэмэгдүүлэхээ амлав. Европын Холбооны төлөөлөгчид энэ үйлдлийг гадаадын дипломатууд зорчдог төмөр замын аюулгүй коридорыг хаах, барууны удирдагчдыг сүрдүүлэх зорилготой дайралт хэмээн буруутгаж байна.
Эх сурвалж:
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.