Украины дроны дайралтад Татарстаны аж үйлдвэрийн хот өртөж, 13 хүн амиа алджээ
2026 оны наймдугаар сарын 10-ны даваа гаргийн дайралтаар Украины зэвсэгт хүчин ОХУ-ын нутаг дэвсгэрийн гүнд орших Татарстаны Нижнекамск аж үйлдвэрийн хотод алсын тусгалтай дроноор цохилт өгч, улмаар 13 хүний амь эрсэджээ.
Хилээс зүүн тийш 1200 орчим километрийн зайд орших тус хотод болсон халдлага нь 2022 онд Орос, Украины мөргөлдөөн эхэлснээс хойш Оросын нутаг дэвсгэрт энгийн иргэдийн амь насыг хохироосон хамгийн их хохиролтой цохилтуудын нэг боллоо. Амиа алдагсдын дунд нэг хүүхэд байсан бөгөөд орон нутгийн эмнэлгийн эх сурвалжуудын мэдээлснээр 78 хүн бэртэж гэмтсэн байна. Халдлагын улмаас амиа алдсан иргэдийн дийлэнх нь орон нутгийн ажилчдын байрлах дотуур байранд дрон унах үеэр амь үрэгджээ.
Украины Зэвсэгт хүчний Ерөнхий штабаас мэдээлснээр тус улсын агаарын цохилт нь Оросын газрын тосны томоохон боловсруулах үйлдвэр болох "Татнефть" компанийн "ТАНЕКО" цогцолборыг чиглэсэн байна. Цохилтын дараа тус үйлдвэрт гал гарч, утаа суунаглаж буй бичлэгүүд цахим сүлжээнд тархжээ. Үүнээс гадна Оросын нийлэг резин, хуванцар үйлдвэрлэлийн хамгийн том төвүүдийн нэг болох "Нижнекамскнефтехим" химийн үйлдвэр мөн халдлагад өртсөн байж болзошгүй байна.
ОХУ-ын зүгээс уг үйл явдлыг "террорист халдлага" хэмээн, эрүүгийн хэрэг үүсгэн шалгаж эхэлжээ. Орон нутгийн удирдлагууд болон хотын дарга Радмир Беляев нар Украины талыг үйлдвэрлэлийн бүсээс гадна энгийн иргэдийн орон сууцны хорооллыг зориуд онилсон гэж буруутгаж байна. Харин Украины Ерөнхийлөгч Володимир Зеленський энэхүү алсын тусгалтай цохилтуудыг Оросын зүгээс Украины хотуудад тасралтгүй хийж буй агаарын бөмбөгдөлтийн эсрэг хууль ёсны хариу арга хэмжээ гэв.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.