Тайландын Дебсирин Нонтхабури сургуульд зэвсэгт халдлага гарч есөн хүн амиа алдлаа
Тайландын Нонтхабури мужийн Дебсирин Нонтхабури хэмээх ахлах сургуульд 2026 оны наймдугаар сарын 7-ны баасан гаргийн өглөө зэвсэгт халдлага гарч, есөн хүн амиа алдаж, 15 гаруй хүн шархадсан хэрэг гарлаа.
Халдлага үйлдсэн этгээд нь тус сургуулийн 15 настай, есдүгээр ангийн сурагч байсан бөгөөд тэрээр сургууль руу явахаасаа өмнө гэртээ өөрийн өвөө, эмээ хоёрыг буудан хөнөөгөөд, улмаар сургуулийнхаа орчинд гал нээж, эцэст нь өөрийн амийг егүүтгэсэн байна.
Хэрэг явдал орон нутгийн цагаар өглөөний 10:00 цагийн орчимд эхэлсэн байна. Сэжигтэн сургуульдаа ирэхээсээ өмнө хамт амьдардаг байсан өвөө, эмээгийнхээ амийг гэрт нь хөнөөсөн байсныг цагдаагийн байгууллага мөрдөн шалгах явцдаа тогтоожээ. Үүний дараа тэрээр биеийн тамирын нил ягаан өнгийн дүрэмт хувцастай, мөрөндөө хар цүнх үүрсэн байдалтай Банг Круай дүүрэгт байрлах сургуульдаа ирж, сургуулийн хашаанд гал нээсэн байна.
Гэрчүүдийн мэдээлснээр, тухайн үед сургуулийн орчинд олон арван удаагийн буун дуу тасралтгүй сонсогджээ. Халдлага үйлдсэнийхээ дараа сэжигтэн сургуулийн гуравдугаар давхрын компьютерын өрөөнд өөрийгөө буудаж амиа алдсан байдалтай олджээ.
Сэжигтэн хэрэг үйлдэхдээ өвөөгийнхөө эзэмшлийн есөн мм-ийн "CZ" загварын гар бууг ашигласан бөгөөд түүний цүнхнээс олон арван сум олдсон байна. Энэхүү аймшигт халдлагын улмаас нийт есөн хүн амиа алдсаны хоёр нь гэртээ алагдсан өвөө, эмээ нь байсан бол сургуулийн орчинд гурван багш, гурван сурагч болон халдлага үйлдэгч өөрөө амиа алджээ. Түүнчлэн 15 хүн шархадсаны хоёрынх нь биеийн байдал маш хүнд байгааг албаныхан мэдээлэв.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.