Бэлэн гоймонгийн хэрэглээ түүхэн дээд хэмжээнд хүрлээ
Бэлэн гоймонгийн хэрэглээ дэлхий даяар эрчимтэй өсөж, зах зээлийн үнэлгээ нь 2026 оны байдлаар 55.68 тэрбумаас 68.53 тэрбум ам.долларт хүрч, түүхэн дээд амжилтыг тогтоолоо.
Хэдийгээр бэлэн гоймонг эрүүл бус, эсвэл хямд төсөр хүнс гэж шүүмжилдэг ч дэлхийн хэмжээнд түүний эрэлт хэрэгцээ урьд өмнө байгаагүйгээр нэмэгдсэн байна. Дэлхийн бэлэн гоймонгийн холбоо (WINA)-ны мэдээлснээр, энэхүү бүтээгдэхүүн нь санхүүгийн хүндрэл болон байгалийн гамшигт нэрвэгдсэн хүмүүст хамгийн чухал тусламж болж, хямралын үед сэтгэл санааны болон бие махбодын аюулгүйн торны үүргийг гүйцэтгэж байна.
Өнөөдөр дэлхийн бэлэн гоймонгийн хэрэглээний дийлэнх хувийг буюу ойролцоогоор 85 хувийг Ази-Номхон далайн бүс нутаг дангаараа бүрдүүлж байна.
Улс орноор нь авч үзвэл, БНХАУ болон Хонконг жилд 43.8 тэрбум порц хэрэглэж байгаагаараа дэлхийд тэргүүлсэн хэвээр байгаа юм. Түүний араас Индонез улс 14.7 тэрбум, Энэтхэг 8.3 тэрбум, харин Вьетнам улс 8.1 тэрбум порц бэлэн гоймон хэрэглэж, дэлхийн хамгийн том хэрэглэгч орнуудын жагсаалтыг тэргүүлж байна.
Гэсэн хэдий ч бэлэн гоймонгийн нэр хүндэд сөргөөр нөлөөлөх эрүүл мэнд, аюулгүй байдлын асуудлууд гарсаар байна. Тухайлбал, Европын хэд хэдэн улсад Salmonella Stanley нянгаар үүсгэгдсэн халдвар дэгдэж, бэлэн гоймонтой холбоотой болох нь тогтоогджээ. Германы зах зээлээс Украинд үйлдвэрлэж, Польшоор дамжуулан оруулж ирсэн Reeva Instant Noodle Dish Chicken Flavor бэлэн гоймонгоос нян илэрсний улмаас эргүүлэн татсан байна.
Халдварын улмаас Дани, Герман, Франц, Их Британи зэрэг орнуудад голчлон хүүхэд, залуучууд өртөж, 83 тохиолдол батлагджээ. Үүнээс гадна бэлэн гоймон дахь натрийн өндөр агууламж, эслэг багатай байдал нь нийгмийн эрүүл мэндийн салбарынхны санааг зовоосон хэвээр байна.
Эдгээр сорилтыг даван туулахын тулд үйлдвэрлэгчид бүтээгдэхүүнийхээ чанарыг сайжруулахад анхаарч эхэллээ. Ази, Африкийн зарим бүс нутагт цус багадалтын түвшин 30 хувиас дээш байгаа тул үйлдвэрлэгчид бэлэн гоймондоо төмөр, А витамин, фолийн хүчил зэрэг амин дэмүүдийг нэмж баяжуулж байна. Мөн эрүүл мэнддээ анхаардаг залуу үеийнхэнд зориулан уураг ихтэй, пробиотик болон ургамлын гаралтай уураг агуулсан шинэ төрлийн бүтээгдэхүүнүүдийг зах зээлд нэвтрүүлж эхэлжээ. Шарж болгоогүй, натри багатай, амт сайжруулагчгүй бэлэн гоймонгийн борлуулалт Энэтхэг, Нигери зэрэг хөгжиж буй зах зээлд хамгийн хурдацтай өсөж байна.
Технологийн болон хэрэглээний шинэ чиг хандлага нь сав баглаа боодлын салбарт ч томоохон өөрчлөлт авчирч байна. Байгаль орчинд ээлтэй байх шаардлагын дагуу үйлдвэрлэгчид полистирол савнаас татгалзаж, богино долгионы зууханд халааж болдог цаасан аяга болон дахин боловсруулах боломжтой нэг төрлийн материал (хальсан)-ыг ашиглах болжээ. Түүнчлэн хэрэглэгчид өөрсдийн хоолны дэглэм, халуун ногооны таашаалд нийцүүлэн захиалгаар бэлэн гоймон хүлээн авах боломжтой, шууд захиалгын үйлчилгээ дэлхийн зах зээлд эрчимтэй нэвтэрч байна.
Дэлхийн бэлэн гоймонгийн зах зээл нь хэрэглээний асар их өсөлт болон эрүүл мэндийн шаардлагуудын уулзвар дээр байна. Хэдийгээр аюулгүй байдал, тэжээллэг чанарын асуудал тулгамдсан хэвээр байгаа ч үйлдвэрлэгчдийн зүгээс хийж буй технологийн шинэчлэл, эрүүл мэндэд тустай орц найрлагын өөрчлөлтүүд нь бэлэн гоймонг ирээдүйд илүү чанартай, байгальд ээлтэй хүнс болон хөгжих боломжийг олгож байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.