Бритни Спирс согтуугаар тээврийн хэрэгсэл жолоодсон хэргээ хялбаршуулан шийдвэрлүүлэв
Алдарт поп дуучин, 44 настай Бритни Спирс согтууруулах ундаа болон мансууруулах бодис хэрэглэсэн үедээ тээврийн хэрэгсэл жолоодсон хэргээ хялбаршуулан шийдвэрлүүлж, шоронд хоригдох ялаас мултарлаа.
Тэрээр Вентура гүнлэгийн Дээд шүүхэд биечлэн хүрэлцэн ирээгүй бөгөөд түүний өмгөөлөгч Майкл А.Голдштейн үйлчлүүлэгчийнхээ өмнөөс болгоомжгүйгээр тээврийн хэрэгсэл жолоодсон гэх хөнгөн зүйл ангийг хүлээн зөвшөөрсөн байна.
Шүүх болон прокурортой байгуулсан гэрээний дагуу дуучин бүсгүй нэг жилийн хугацаатай тэнсэн харгалзах ял сонссон бөгөөд энэ хугацаанд тэнсэнгийн ажилтантай заавал уулзах шаардлагагүй аж. Мөн нэг өдөр шоронд хоригдох ял оноосон ч үүнийг анх баривчлагдах үедээ саатуулагдсан хугацаанд нь оруулан тооцжээ. Түүнчлэн улсаас тогтоосон 571 ам.долларын торгууль төлж, гурван сарын хугацаатай архи, мансууруулах бодисын хамаарлын эсрэг сургалтад заавал хамрагдах үүрэг хүлээсэн байна.
Ялын нөхцөлийн бас нэгэн чухал хэсэг нь тээврийн хэрэгсэл доторх хувийн орон зайн халдашгүй байдлаа түр хугацаанд хязгаарлуулахыг зөвшөөрсөн явдал юм. Өөрөөр хэлбэл, цагдаа нар түүний машиныг зогсоосон тохиолдолд шууд нэгжлэг хийх, эрүүл эсэхийг шалгах сорил авах бүрэн эрхтэй болж байна.
Гэхдээ шүүгчийн шийдвэрээр энэхүү нөхцөл нь түүний гэрт хамаарахгүй юм. Үүнээс гадна сэтгэцийн эрүүл мэнд болон донтолтын эсрэг эмчилгээгээ үргэлжлүүлж, долоо хоног бүр сэтгэл засалчтай, сар бүр сэтгэцийн эмчтэй уулзах шаардлагатай болжээ.
Уг хэрэг нь гуравдугаар сарын 4-ний лхагва гаргийн шөнө гарсан байна.
Калифорнийн хурдны замын цагдаагийн газар оройн 21:00 цагийн орчимд Вестлэйк Виллежийн ойролцоох 101 чиглэлийн хурдны замд хар өнгийн седан машин хурд хэтрүүлэн, гэрэлгүй, эгнээ байр сольж давхиж байна гэх дуудлага хүлээн авчээ. Цагдаа нар түүний хар өнгийн BMW 430i маркийн автомашиныг зогсоон шалгахад согтууруулах ундаа болон мансууруулах бодис хэрэглэсэн шинж тэмдэг илэрсэн тул газар дээр нь сорил авч, улмаар баривчлан саатуулсан байна. Тэрээр шөнийн 03:00 цагт урьдчилан саатуулах төвд хүргэгдэж, өглөөний 06:00 цагийн орчимд суллагджээ.
Вентура гүнлэгийн дүүргийн прокурор Эрик Насаренкогийн мэдэгдсэнээр, энэхүү ял тохиролцох санал нь өмнө нь ийм төрлийн хэрэгт холбогдож байгаагүй, цусан дахь спиртийн хэмжээ бага, ямар нэгэн осол гаргаж хүн бэртээгээгүй этгээдэд санал болгодог ердийн журам аж. Мөн дуучин бүсгүй дөрөвдүгээр сард сайн дураараа мансууруулах бодисын хамаарлын эсрэг эмчилгээний төвд хэвтэж, өөрийн үйлдэлдээ хариуцлагатай хандсан нь хэргээ хөнгөрүүлэхэд эергээр нөлөөлсөн болохыг прокурорууд онцолсон байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.