Этиоп улсад 12.5 тэрбум ам.долларын өртөг бүхий Африкийн хамгийн том нисэх онгоцны буудлыг барьж эхэллээ

Этиоп улс нийслэл Аддис-Абеба хотоос зүүн өмнө зүгт 45 километрийн зайд байрлах Бишофту хотод 12.5 тэрбум ам.долларын өртөг бүхий олон улсын нисэх онгоцны шинэ буудлын барилгын ажлыг албан ёсоор эхлүүлжээ.

Уг мега төсөл нь тус улсыг Дубай, Доха зэрэг хотуудтай өрсөлдөхүйц дэлхийн дамжин өнгөрөх гол зангилаа болгох зорилготой бөгөөд ашиглалтад орсноор Африкийн хамгийн том нисэх хүчний төв болох аж.

Алдарт "Zaha Hadid Architects" компанийн загвараар баригдаж буй тус байгууламж нь дөрвөн хөөрч буух зурвас, 270 онгоцны зогсоолтой байх аж.

Төслийн эхний үе шат 2030 онд дуусах бөгөөд жилд 60 сая зорчигч хүлээн авах хүчин чадалтайгаар нээгдэнэ. Харин бүрэн ашиглалтад орсноор жилд 110 сая зорчигч, 3.73 сая тонн ачаа тээвэрлэх боломжтой болох юм.

Барилгын дизайныг Этиопийн Их Рифтийн хөндийгөөс сэдэвлэн гаргасан бөгөөд нарны эрчим хүч, борооны ус цуглуулах систем зэрэг байгальд ээлтэй шийдлүүдийг түлхүү тусгажээ.

Төслийн санхүүжилтийн 30 хувь буюу 3.75 тэрбум ам.долларыг "Ethiopian Airlines" компани өөрийн хөрөнгөөр гаргах бол үлдсэн 8 тэрбум ам.долларыг олон улсын зээлдэгчдээс босгохоор хэлэлцээ хийж байна. Этиопийн Сангийн сайд Ахмед Шиде болон "Ethiopian Airlines" компанийн гүйцэтгэх захирал Месфин Тасев нар Вашингтон хотод санхүүжилт татах уулзалтуудыг амжилттай зохион байгуулсан бөгөөд АНУ-ын Төрийн департамент болон санхүүгийн байгууллагууд уг төслийг дэмжихээ илэрхийлжээ. Мөн Африкийн хөгжлийн банк 500 сая ам.долларын хөрөнгө оруулалт хийхээ баталгаажуулсан байна.

Шинэ нисэх онгоцны буудлын бүтээн байгуулалт нь нийгэм, эдийн засагт томоохон нөлөө үзүүлнэ. Төслийн хүрээнд нисэхийн салбарын 26,000 гаруй мэргэжилтэн шинээр ажлын байртай болох юм.

Барилгын талбайд орсон 9,000 акр газрыг чөлөөлөх үеэр 15,000 орчим иргэнийг нүүлгэн шилжүүлсэн бөгөөд тэднийг орон сууцжуулах, амьжиргааг сэргээхэд зориулж 350 сая ам.доллар төсөвлөн сургууль, эмнэлэг бүхий 1400 орчин үеийн байшин барьж байна.

Үүнтэй зэрэгцэн "Ethiopian Airlines" компани алсын зайн нислэгт зориулан зургаан ширхэг "Boeing 787-9 Dreamliner" онгоц нэмж захиалснаар нийт захиалгын тоо 26-д хүрчээ.

Эх сурвалж:

• ghanaweb.com

• africa.businessinsider.com

• corporate.ethiopianairlines.com

• ena.et

• ethiopanorama.com