Сингапурын "Чанги" дэлхийн шилдэг нисэх онгоцны буудлаар дахин шалгарлаа
Лондон хотноо зохион байгуулагдсан "Passenger Terminal Expo" арга хэмжээний үеэр Сингапурын Чанги нисэх онгоцны буудал "Skytrax" байгууллагын дэлхийн шилдэг нисэх онгоцны буудлаар 14 дэх удаагаа шалгарлаа.
Дэлхийн нисэх хүчний салбарт тэргүүлэгч тус байгууламж нь өндөр зэрэглэлийн үйлчилгээ, дэвшилтэт дэд бүтцийнхээ ачаар энэхүү нэр хүндтэй шагналыг дахин хүртэж, салбартаа өөрийн байр суурийг улам бататгав.
Чанги нисэх онгоцны буудал нь гол шагналаас гадна хэд хэдэн чухал төрөлд тэргүүлсэн байна.
Тодруулбал, орон нутгийн болон олон улсын хоолны өргөн сонголттой тул "Дэлхийн шилдэг зоогийн газартай нисэх буудал", зорчигчдыг саадгүй нэвтрүүлдэг тул "Шилдэг цагаачлалын үйлчилгээ", мөн "Азийн шилдэг нисэх буудал"-аар тус тус нэрлэгджээ. Түүнчлэн жилд 60-70 сая зорчигчдод үйлчлэх ангилалд тэргүүлсэн бол тус буудлын дэргэдэх "Crowne Plaza" зочид буудал 11 дэх жилдээ дараалан дэлхийн шилдгээр тодорсон байна. Энэ оны жагсаалтын эхний тавд Сөүлийн Инчон, Токиогийн Ханэда, Хонконгийн олон улсын нисэх буудал болон Нарита багтжээ.
Тус байгууламжийн амжилтын гол үндэс нь зорчигчдод санал болгодог тав тухтай, шинэлэг орчин юм.
Дэлхийн хамгийн өндөр доторх хүрхрээ бүхий "Jewel Changi", эрвээхэйн цэцэрлэгт хүрээлэн, 24 цагийн үнэ төлбөргүй кино театр зэрэг нь зорчигчдын сэтгэл ханамжид өндрөөр нөлөөлдөг.
Мөн Европын хөл хөдөлгөөн ихтэй нисэх буудлуудтай харьцуулахад илүү тайван, эрүүл мэндэд ээлтэй орчныг бүрдүүлж чадсан төдийгүй бүртгэл, шалган нэвтрүүлэх үйл явцыг бүрэн автоматжуулсан нь өрсөлдөгчдөөсөө ялгарах давуу тал болжээ.
Нөгөөтэйгүүр, өмнөх жилүүдэд хүчтэй өрсөлдөгч байсан Дохагийн Хамад олон улсын нисэх онгоцны буудал бүс нутгийн аюулгүй байдалд анхаарах зорилгоор энэ удаагийн шалгаруулалтаас нэрээ татсан нь Чангийн байр суурийг улам бэхжүүлсэн байна.
Цаашдын хөгжлийн хүрээнд Чанги нисэх онгоцны буудал 5-р терминалын бүтээн байгуулалтын ажлыг эрчимтэй үргэлжлүүлж байна.
Өнгөрсөн оны тавдугаар сард шаваа тавьсан уг терминал нь жилд 50 сая зорчигч хүлээн авах хүчин чадалтай бөгөөд 2030-аад оны дундуур ашиглалтад орох юм. Энэ оны эхээр 3-р терминал дээр шинэ бүтээн байгуулалтын талаарх үзэсгэлэн нээгдэж, хиймэл оюун ухаанд суурилсан ухаалаг системүүдийг олон нийтэд танилцуулсан. Өнгөрсөн онд 70 сая орчим зорчигчдод үйлчилж дээд амжилт тогтоосон тус байгууламж нь өсөн нэмэгдэж буй эрэлт хэрэгцээг хангахын тулд ачаа тээш зөөвөрлөх робот болон нислэгийн саатлыг урьдчилан таамаглах ухаалаг системийг туршиж эхлээд байна.
Эх сурвалж:
• cnalifestyle.channelnewsasia.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.