АНУ-ын анхаарал Иран руу шилжсэн нь Украинд эрсдэл дагуулж байгааг Зеленский анхааруулав
Украины Ерөнхийлөгч Володимир Зеленский Киев дэх өрөөнөөсөө "CNN" агентлагийн сэтгүүлч Кристиан Аманпурт 2026 оны 4-р сарын 22-ны өдөр ярилцлага өгөх үеэрээ АНУ-ын анхаарал Иранд өрнөж буй дайнд төвлөрч байгаа хэдий ч Оросын түрэмгийллийг зогсоох дипломат хүчин чармайлтыг түр зогсоож болохгүйг хатуу анхааруулав.
Тэрээр Вашингтоны Ойрх Дорнод дахь нөхцөл байдалд анхаарлаа хандуулж байгааг ойлгож байгаа ч Украиныг хоёрдугаарт тавих нь маш том эрсдэл дагуулна гэдгийг онцолсон байна.
АНУ-ын хэлэлцээрийн багийн бүтцийн асуудал нь Украины хувьд томоохон сорилт болж байна. Тодруулбал, АНУ-ын Тусгай элч Стив Виткофф болон Ерөнхийлөгч Дональд Трампын хүргэн Жаред Кушнер нар Ираны мөргөлдөөн болон Украин-Оросын асуудлыг хоёуланг нь хариуцан ажиллаж байгаа юм. Зеленскийн мэдэгдсэнээр, техникийн түвшний харилцаа холбоо үргэлжилж байгаа хэдий ч Ираны асуудал нээлттэй хэвээр байгаа цагт өндөр түвшний дипломат уулзалтууд хойшилж, ойрын хугацаанд зохион байгуулагдах магадлал багасчээ.
Дипломат харилцаанаас гадна Иранд өрнөж буй дайн нь Украинд нийлүүлэх амин чухал зэвсгийн хангамжид ноцтой саад учруулж эхэлсэн байна. АНУ-ын үйлдвэрлэлийн хүчин чадал хязгаарлагдмал байгаагаас шалтгаалан анх Украинд зориулагдсан баллистик пуужингаас эсэргүүцэн хамгаалах пуужингуудыг Ираны дайнд зарцуулж байгааг Украины төрийн тэргүүн онцгойлон дурдлаа. Энэхүү зэвсгийн хомстол нь фронтын шугам дахь Украины батлан хамгаалах чадварт шууд нөлөөлж байгаа юм.
Энэхүү эгзэгтэй цаг үед Европын Холбоо 2026-2027 онд Украиныг санхүүгийн хувьд тогтвортой байлгах зорилготой 90 тэрбум еврогийн зээлийн хөтөлбөрийг батлах урьдчилсан тохиролцоонд хүрч чадлаа. Уг зээлийг Унгарын Ерөнхий сайд Виктор Орбан хэдэн сарын турш хориглож, Оросын газрын тосны дамжин өнгөрөх тээврийг сэргээхийг шаардаж байсан юм. Гэвч өнгөрсөн долоо хоногт болсон Унгарын парламентын сонгуульд Орбан ялагдал хүлээсний дараа Украин "Дружба" дамжуулах хоолойгоор Унгар, Словак руу Оросын түүхий газрын тосыг дахин нийлүүлж эхэлснээр зээл олгох зам нээгджээ.
Зеленский энэхүү 90 тэрбум еврогийн зээлийг Украины хувьд "амь нас, оршин тогтнох" асуудал хэмээн тодорхойлсон байна. Санхүүжилт дутмаг байсны улмаас тус улсын дотоодын аж үйлдвэр дөнгөж хагас хүчин чадлаараа ажиллаж байсан бөгөөд одоогоор өдөрт 1000 ширхэг дрон эсэргүүцэгч үйлдвэрлэж байгаа аж.
Харин Европын Холбооны санхүүжилт бүрэн баталгаажсанаар энэхүү үйлдвэрлэлийн хүчин чадлыг өдөрт 2000 ширхэгт хүргэж, батлан хамгаалах салбараа эрс бэхжүүлэх боломж бүрдэх юм.
Эх сурвалж:
• uatv.ua
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.