🔴Б.Тулга: Нийслэлд хийж байгаа бүтээн байгуулалтыг харлуулах арми цахим орчинд ажиллаж байна

УИХ-ын гишүүн Б.Тулга Засгийн газрын хуралдаанаар Туулын хурдны замын төслийг зогсоосон асуудалтай холбогдуулан өөрийн байр сууриа илэрхийллээ. Тэрээр Монгол Улсад том хэмжээний бүтээн байгуулалт, мега төслүүд зайлшгүй хэрэгжих ёстой цаг үе ирсэн гэдгийг онцлоод, Засгийн газрын шийдвэрийг төслийг бүрмөсөн зогсоосон бус, харин хууль зөрчсөн асуудал байгаа эсэхийг нягтлах зорилгоор түр хугацаанд царцаасан үйлдэл гэж харж байгаагаа хэлэв. Уг төсөл нь Улаанбаатар хотын утаа, түгжрэлийн асуудлыг шийдвэрлэхэд шууд нөлөөлөх чухал ач холбогдолтой тул иргэдийн эсэргүүцэл, хууль эрх зүйн зөрчлийг тодруулан засаж залруулаад, бүтээн байгуулалтын ажлыг цааш хэвийн үргэлжлүүлэх шаардлагатай гэж үзэж байна.

УИХ-ын гишүүн Б.Тулга:

-Туулын хурдны замын төсөл Улаанбаатар хотын утаа, түгжрэлийн асуудлыг шийдвэрлэхэд шууд нөлөөлөх чухал ач холбогдолтой тул иргэдийн эсэргүүцэл, хууль эрх зүйн зөрчлийг тодруулан засаж залруулаад, бүтээн байгуулалтын ажлыг цааш хэвийн үргэлжлүүлэх шаардлагатай.

Энэ асуудалд улс төрийн өнцгөөс хандаж, бүтээн байгуулалтын ажлыг гацааж байна. Туулын хурдны зам болон бусад мега төслүүд нь эрх баригчдын төдийгүй үе үеийн Засгийн газар, УИХ-аар батлагдсан мөрийн хөтөлбөрт тусгагдсан ажлууд. Нийслэлийн хийж хэрэгжүүлж буй ажлыг цахим орчинд зохион байгуулалттайгаар эсэргүүцдэг бүлэг бий болсон байна. Аливаа төсөл хөтөлбөрт сошиалын нөлөөллөөр бус, харин мэргэжлийн инженер, судлаачдын үг, дүгнэлтэд үндэслэн шийдвэр гаргах ёстой.

Орон нутаг болон нийслэлийн түвшинд шийдвэрлэх ёстой асуудлыг УИХ руу оруулж ирж гацаадаг байдал буруу. Нийслэлийн ИТХ-аар шийдвэрлэгдэж, өөрсдийнх нь мөрийн хөтөлбөрт орсон ажлыг нийслэл бие даан хэрэгжүүлж чадахгүй, заавал парламент дээр авчирч улс төржүүлдэг байдал үргэлжилбэл цаашдаа сумын хэмжээний төсвийг хүртэл УИХ-аар хэлэлцэхэд хүрэх эрсдэлтэй. Төрийн шат шатны байгууллагууд өөрсдийн эрх үүргийн хүрээнд ажлаа хийх ёстой гэв.