Үрийн шингэн хууль бусаар хандивлагч хүүхдийн төрсний гэрчилгээнд нэрээ оруулах эрхээ алдлаа
Их Британийн гэр бүлийн хэргийн дээд шүүхээс 53 настай АНУ-ын иргэн Роберт Чарльз Албон гэгчийн нэхэмжлэлийг хэрэгсэхгүй болгож, дөрвөн настай хүүхдийн төрсний гэрчилгээнд эцгээр бүртгүүлэх боломжгүй гэсэн эцсийн шийдвэрийг гаргалаа.
"Жо Донор" гэх нууц нэрээр цахим орчинд үрийн шингэн хууль бусаар хандивлах үйл ажиллагаа явуулдаг байсан тэрээр ийнхүү олон жил үргэлжилсэн шүүхийн маргаанд ялагдал хүлээв.
Р.Албон нь уг хүүхдийн эцэг гэдгээ хууль ёсоор хүлээн зөвшөөрүүлэх, хүүхэдтэй шууд харилцах, нэрийг нь солих, түүнчлэн биологийн бус эхийг нь зөвхөн "авга эгч" хэмээн дуудахыг шаардаж шүүхэд хандсан байна. Хүүхдийн эхчүүд болох ижил хүйстэн хос анх түүнийг сонгохдоо "ямар ч холбоо тогтоохгүй" гэсэн амлалтад нь итгэсэн боловч төрсний гэрчилгээнд хоёр дахь эцэг эхээр биологийн бус эхийг бүртгүүлснийг мэдсэний дараа тэрээр ийнхүү шүүхээр хөөцөлдөж эхэлжээ.
Хоёр жил гаруй үргэлжилсэн энэхүү шүүхийн маргаан нь гэр бүлийнхэнд маш хүндээр тусаж, хосын харилцаа тасрахад нөлөөлсөн байна. Хүүхдийн эхчүүд энэ хугацааг "хар дарсан зүүд, аймшгийн түүх" хэмээн тодорхойлсон бөгөөд биологийн эх нь шүүхийн үйл явцаас үүдэлтэйгээр хэт түгших, сэтгэл гутралд орох, амиа хорлох бодол тээх зэрэг сэтгэл зүйн ноцтой хямралд орсноо мэдүүлжээ.
Шүүх хурлын үеэр эмзэг бүлгийн эмэгтэйчүүдэд сэрэмжлүүлэх зорилгоор шүүгч Жонатан Фурнесс тэргүүтэй албаныхан түүний нэрийг олон нийтэд ил болгох ховор шийдвэр гаргасан юм.
Р.Албон нь АНУ, Хятад, Аргентин, Австрали, Их Британи зэрэг улсуудад нийт 180 хүүхдийн эцэг болсон гэж мэдэгддэг бөгөөд фэйсбүүк, инстаграм ашиглан хувиараа үйл ажиллагаа явуулах замаар нэг хандивлагчаас дээд тал нь 10 гэр бүлд үрийн шингэн өгөх, эрүүл мэндийн нарийн шинжилгээнд хамрагдахыг шаарддаг Их Британийн хатуу хууль тогтоомжийг зөрчсөн болох нь тогтоогджээ.
Шүүхээс түүний үйлдлийг "зөвхөн өөрийгөө бодсон" хэрэг хэмээн буруутгаж, хүүхэдтэй харилцах нь ямар ч эерэг үр дагавар авчрахгүй гэж дүгнэв. Түүнчлэн энэхүү шүүхийн маргааныг Их Британид оршин суух визний мэдүүлгээ баталгаажуулах зорилгоор ашигласан байж болзошгүй гэж үзсэн ч тэрээр үүнийг үгүйсгэсэн байна. Хохирогч талын өмгөөлөгч энэхүү шүүхийн шийдвэр нь зохицуулалтгүй үрийн шингэн хандивлагчийн зах зээл ямар их эрсдэлтэй болохыг харуулсан чухал сургамж болсныг онцлон тэмдэглэлээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.