🔴М.Нарантуяа-Нара: Р.Батболд гишүүн МАН-д худалдагдаж ИЗНН-ыг хагалан бутаргаж байна

УИХ-ын гишүүн М.Нарантуяа-Нара өнөөдөр сэтгүүлчдэд мэдээлэл өгөх үеэрээ Иргэний Зориг Ногоон Нам (ИЗНН)-ын дотоод хагарал болон эрх баригч намын нөлөөллийн талаар ноцтой мэдэгдлүүд хийлээ.

Тэрээр УИХ-ын гишүүн Р.Батболдтой Байнгын хорооны хуваарилалтаас үүдэн маргалдаж, зодолдох дээрээ тулсан талаар ярьсан юм.

УИХ-ын гишүүн М.Нарантуяа-Нара:

-УИХ-ын гишүүд Байнгын хороонд орох хүсэлтээ намын даргын албан бланк дээр гаргаж, зөвшилцөх ёстой байдаг. Гэвч гишүүн Р.Батболд намын зөвлөлийн хуралд ирээгүй,  бусад гишүүдийнхээ гаргасан шийдвэрийг хүндэтгэхгүй байна.

Анх УИХ-ын гишүүн болох үедээ Р.Батболд нь Эдийн засаг болон Төсвийн байнгын хороонд орох хүсэлтээ илэрхийлж, дараа жил нь солилцоно гэж тохиролцсон ч өнөөдөр амнаасаа буцаж, Байнгын хороондоо үлдэнэ хэмээн зөрүүдлэх болсон. Мөн тэрээр гишүүн С.Замирагийн өрөөнд орж, түүний гарын үсэг зурсан хүсэлтийг хүчээр балуулахыг оролдсон.

Р.Батболдыг эрх баригч Монгол Ардын Нам (МАН)-д худалдагдаж, ИЗНН-ыг хагалан бутаргах гар хөл нь болж байна. 2024 оны сонгуулиар хоолны ч мөнгөгүй байсан хүн өнөөдөр хэдэн зуун хүний өмнөөс намын татвар төлж, хурал зохион байгуулах хэмжээний мөнгөтэй болсон нь сэжигтэй. УИХ-ын дарга чуулганы индэр дээрээс Р.Батболдыг илт хамгаалж, ИЗНН-ыг шууд бойкотолж байгаа нь МАН урьд өмнө нь бусад намуудыг хагалан бутаргаж байсан туршлагаа ИЗНН дээр хэрэгжүүлж байна.

ИЗНН нь 70 мянган сонгогчийн саналаар УИХ-д орж ирсэн бөгөөд Р.Батболд шиг хувь хүнийг бус, намын мөрийн хөтөлбөрийг ард түмэн дэмжсэн. Олон нийтэд хандан энэхүү үйл явдлыг зүгээр нэг хэрүүл маргаан гэж харахын оронд Монголын улс төрд явагдаж буй бохир наймаа, хуйвалдааныг олж харах хэрэгтэй. Энэ асуудалтай холбогдуулан ИЗНН-ын Онц их хурлыг хуралдуулах шаардлагатай гэв.