Засгийн газар: Н.Энхбаяр, С.Баяр, С.Батболд, Р.Амаржаргал, М.Энхсайхан нарыг Тусгай үүрэгт элчингээр томилно

Засгийн газрын өнөөдрийн хуралдаанаар Монгол Улсын Ерөнхийлөгч асан Н.Энхбаяр, Монгол Улсын Ерөнхий сайдаар ажиллаж байсан М.Энхсайхан, Р.Амаржаргал, С.Баяр, С.Батболд, Ж.Эрдэнэбат, М.Энхболд нарыг Элчин сайдаар томилохыг Гадаад харилцааны сайдад даалгасан гэх мэдээлэл цацагдсан юм.

Тэгвэл энэ асуудалд Засгийн газрын холбогдох албан тушаалтан дараах мэдээллийг өглөө.

Засгийн газар “Үе үеийн ҮАБЗ-ийн гишүүдийг Элчин сайдаар томилох гэж байгаа мэтээр бичээд байна. Тусгай үүрэгт элчин гэсэн өөр ойлголт шүү. Энэ хүмүүс мега төслүүд дээр дэмжлэг үзүүлж ажиллах ёстой. Томоохон хэлэлцээрт орох, олон улсын гэрээ хэлэлцээр дээр өөрсдийн туршлагаараа дэмжлэг үзүүлж зөвлөгөө өгөх үүрэгтэй. Ерөнхий сайд 14 мега төслөө урагшлуулах зорилгоор үүнийг авч хэрэгжүүлж байгаа. Энэ хүмүүс гадаад улсад томилогдоод, тэндээ амьдраад ажиллах хүмүүс огт биш. 1990 оноос хойш ҮАБЗ-д ажиллаж байсан гишүүд ийм тодорхойлолттойгоор тэмдэглэлд туссан байгаа. Дээрх нэр нь дурдагдсан хүмүүс. Үе үеийн Ерөнхийлөгч, Засгийн газрын тэргүүн, УИХ-ын дарга нар мега төслүүд дээр шат дараатай тогтоол шийдвэр оруулж, хэлэлцүүлж, батлуулж байсан туршлага байгаа гэсэн үндсэн дээр ийм шийдвэр гаргаж байгаа. Ерөнхий сайд эхнээс нь уулзалт хийж, хэн ямар төсөл дээр ажиллахыг ярилцаж байгаа гэв.

Түүнчлэн Ерөнхий сайд Л.Оюун-Эрдэнэ хэд хоногийн өмнө хэвлэлд өгсөн ярилцлагадаа үе үеийн ҮАБЗ-ийн гишүүдийг Тусгай үүрэгт элчингээр томилох болсон талаараа мэдэгдсэн билээ.