Сэрэмжлүүлэг: Согтуугаар Хэрлэн голын усанд орж, осолдсон иргэнийг эрэн хайж байна

Дорнод аймгийн Хэрлэн сумын нэгдүгээр баг  “Хэрлэн” голын усанд нэг хүн живсэн тухай дуудлагыг онцгой байдлын байгууллага энэ сарын 13-ны өдрийн 17:21 цагт хүлээн авсан байна. 

Тус аймгийн Онцгой байдлын газрын Эрэн хайх, аврах ангийн алба хаагчид очиж,  40 настай, эрэгтэй А-г  эрэн хайх ажиллагааг анх осолдсон газар 2.5 метрийн гүнд гурван удаагийн шумбалт хийж, голын дагуу 20 км зайд гурван удаагийн давтамжтай завь болон автомашинтай зохион байгуулж байна. А нь согтууруулах ундааны зүйл хэрэглэсэн үедээ гол руу орсон аж.

Мөн Хэнтий аймгийн Баян-Овоо сумын дөрөвдүгээр багт “Хэрлэн” голын усанд нэг хүн живсэн тухай дуудлагыг онцгой байдлын байгууллага энэ сарын 13-ны өдрийн 16:44 цагт хүлээн авчээ. Тус аймгийн Онцгой байдлын газрын Эрэн хайх, аврах салбарын алба хаагчид 38 настай, эрэгтэй М-ийг эрэн хайх ажиллагааг зохион байгуулж байна.