С.Бямбацогт: Вагоны машинистууд согтуу, хурд хэтрүүлснээс осол гарсан байна

Есдүгээр сарын 28-ны шөнө Дорноговь аймгийн Хулангийн Шанд зөрлөгт 17 вагон бүхий галт тэрэг замын хажуу руу унаж, осолдсон талаар бид мэдээлсэн. Ослын талаар Зам тээвэр, хөгжлийн сайд С.Бямбацогт мэдээлэл хийлээ.

Зам тээврийн хөгжлийн сайд С.Бямбацогт:

-Урьд шөнө Дорноговь аймгийн Улаанбадрах суманд галт тэрэгний осол болсон. Зүүнбаян өртөөнөөс Ханги-Мандалын төмөр замын чиглэлд ачаа ачсан "Монголиан транс ложистик" компанийн вагон замаас гарч унасан осол боллоо.
Дорноговь аймгийн Улаанбадрах сумын Зүүнбаян өртөөнөөс 75 км зайтай Хулангийн Шанд гэх зөрлөгт уг осол гарсан. Өнгөрсөн шөнө 23:30 минутын орчимд хөдөлж, 24:20 минутын орчимд уг осол бүртгэгджээ.
Нийтдээ цуваанд 17 вагон явж байсан. 14 нь төмөр замын рейс төмөр, гурав нь төмөр замын дэр ачсан байна лээ. Ханги-Мандлын төмөр замын бүтээн байгуулалтыг барьж буй ачаа байсан. "Монголиан транс логистик" буюу Болд төмөр ерөө гол компанийн галт тэрэг осол гаргасан байна.

Ачсан ачаатай вагон замаас гарч унасан. Вагонд гурван хүн зорчиж байсан. Биеийн байдал гайгүй байна. Хүний амь нас эрсдээгүй. Ослын шалтгааныг газар дээр нь тодруулахаар хамтарсан баг газар дээр нь ажиллаж байна. Урьдчилсан байдлаар вагон хурд хэтрүүлсний улмаас замаас гарсан байх гэсэн дүгнэлт гарсан. Вагоны машинист нь согтуу байсан гэх мэдээлэл ирж байна. Цаашлаад хууль хяналтын байгууллага ажиллаж байна гэв.