МАН, МАХН нэгдэх "Эв нэгдлийн гэрээ"-д гарын үсэг зурах ёслолын үйл ажиллагаа яг одоо үргэлжилж байна. Үүнтэй зэрэгцээд УИХ-ын гишүүн С.Ганбаатар МАХН-аас гарах өргөдлөө хүлээлгэн өглөө. 

УИХ-ын гишүүн С.Ганбаатар 2017 онд МАХН-д элсэж байсан бөгөөд таван жил орчим тус намд хүчин зүтгэсний эцэст өнөөдөр ийнхүү тус намаас гарч байгаа ажээ.

Тэрээр, "МАН-ын 62 суудлыг 63 болго гэж намайг сонгоогүй учраас МАХН-аас гарч байна" хэмээжээ. 

Гэвч түүний намаасаа гарч байгаа шалтгаан нь Ерөнхийлөгчийн сонгуулиас үүдэлтэй гэж олон нийт таамаглаж байна. Учир нь МАХН Ерөнхийлөгчийн сонгуульд нэр дэвшигчээ өрсөлдүүлэхгүйн дээр, МАН-тай нэгдэж байгаа нь МАХН-аас Ерөнхийлөгчийн сонгуульд өрсөлдөх гэж байсан УИХ-ын гишүүн С.Ганбаатарын боломжийг хааж байгаа хэрэг юм. Тиймээс тэрээр ийнхүү МАХН-аас гарах шийдвэрт хүрчээ.

Харин одоо УИХ-ын гишүүн С.Ганбаатар Ардчилсан намд элсэх үү, эсвэл бие дааж Ерөнхийлөгчийн сонгуульд өрсөлдөх үү, бүүр өөр сонголт хийх үү гэдэг асуулт үлдэж байна. 

---