Нью-Йорк хот хүнсний хаягдлын асуудлаа Өмнөд Солонгосын туршлагаар шийдвэрлэхийг зорьж байна
Нью-Йорк хот органик хог хаягдлын менежментээ бүрэн шинэчлэхээр ажиллаж байгаа бөгөөд сүүлийн гучин жилд хүнсний хаягдлаа бараг бүрэн дахин боловсруулж чадсан БНСУ-ын загварыг судалж байна.
Дэлхий даяар жил бүр нэг тэрбум гаруй тонн хүнс хаягдаж, нийт хүлэмжийн хийн ялгарлын 10 орчим хувийг үүсгэдэг билээ. Ялангуяа АНУ-д айл өрх, худалдааны цэг, зоогийн газруудаас гарч буй хүнсний хаягдлын 60 орчим хувийг хөрсөнд булж устгадаг нь хогийн цэгээс ялгарах метан хийн гол эх үүсвэр болж байна.
Нөхцөл байдлыг өөрчлөхийн тулд Нью-Йорк хотын захиргаа 2024 оны аравдугаар сараас эхлэн 3.4 сая өрхийг хамарсан органик хаягдлыг заавал ангилан ялгах бодлого хэрэгжүүлж, 400 гаруй ухаалаг хогийн савыг байршуулжээ. Гэвч иргэдийн оролцоо болон дадал зуршил хангалтгүй байгаагаас шалтгаалан өдгөө ахуйн органик хаягдлын дөнгөж 9 орчим хувийг л дахин ашиглаж чадаж байна.
Харин БНСУ хогийн цэгийн хомстол, хурдацтай хотжилт зэргээс үүдэлтэй хямралыг 30 жилийн хугацаанд амжилттай шийдвэрлэсэн туршлагатай юм. Тус улс 1995 онд хаягдлын хэмжээнээс хамаарч төлбөр авах системийг нэвтрүүлж, 1997 онд хүнсний хаягдлыг заавал ялгах журам баталжээ. Улмаар 2005 онд боловсруулаагүй хүнсний үлдэгдлийг хогийн цэгт булахыг хуулиар хориглосон байна.
Эдгээр бодлогын үр дүнд 1996 онд 2.6 хувьтай байсан хүнсний хаягдал дахин боловсруулалтын үзүүлэлт өдгөө 97-98 хувьд хүрч, хөрсөнд булах хэмжээ бараг тэг болжээ.
Энэхүү ололтод технологийн дэвшил чухал үүрэг гүйцэтгэсэн бөгөөд 2010-2013 онд Сөүл зэрэг томоохон хотын орон сууцнуудад RFID буюу радио давтамжийн карт уншдаг ухаалаг савнуудыг суурилуулсан байна. Оршин суугчид картаа уншуулан хаягдлаа хийхэд хогийн сав жинг нь шууд хэмжиж, хэмжээнээс нь шалтгаалан тухайн өрхөд төлбөр ногдуулдаг ажээ.
Шингэн зүйл хаягдлын жинг нэмдэг тул иргэд төлбөрөө бууруулахын тулд усыг нь сайтар шавхах дадалд суралцсан байна. Цуглуулсан органик хаягдлыг Тэжон дахь "Bio Energy Centre" зэрэг үйлдвэрүүдэд цахилгаан болон дулаан гарган авах биогаз, чанартай бордоо, малын тэжээл болгон боловсруулж байна.
Шинжээчдийн дүгнэснээр Нью-Йорк хот биогаз, бордооны байгууламжууд болон бордоожуулалтын хөтөлбөрөө өргөжүүлж эхэлсэн ч Солонгос шиг өндөр үр дүнд хүрэхийн тулд хүн нэг бүрийн хариуцлагыг нэмэгдүүлсэн ухаалаг систем болон урт хугацааны тасралтгүй боловсрол зайлшгүй шаардлагатай байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.