Ардчилсан намын 2020 оны 12 дугаар сарын 18-ны өдрийн Х дугаар их хурлаар баталсан үндсэн дүрэмд оруулсан нэмэлт өөрчлөлтийг бүртгүүлэх, улсын бүртгэлийн гэрчилгээнд өөрчлөлт оруулах хүсэлтийг Улсын дээд шүүхэд хүргүүлсэн. Улсын Дээд шүүх энэ хүсэлтийг бүртгэж аваагүй.

Учир нь Үндсэн дүрмийн өөрчлөлтөд засах зүйл, тодруулга авах зүйл байна хэмээн үндсэн дүрмийг бүртгээгүй билээ. Ардчилсан намын 10-р их хурлаар хэлэлцэн баталсан Үндсэн дүрмийн өөрчлөлтийг Улсын дээд шүүх өнөөдөр хоёронтоо авч хэлэлцлээ. Ингээд улс төрийн намын тухай хуулийн дагуу намын дотоод маргаанаа эцэслэн шийдвэрлэж байж дахин хандана уу гэсэн тайлбартайгаар бүртгэхээс татгалцлаа. 

Ардчилсан намын Хэрэг эрхлэх газрын дарга П.Нүрзэд: Ардчилсан намын Үндсэн дүрмийн нэмэлт өөрчлөлтийг Дээд шүүх бүртгэж авсангүй. Хэсэг бүлэг хүмүүс заалт зүйлтэйгээр маргаж байгаа тул намын дотоод маргаанаа эцэслэх ёстой хэмээн Дээд шүүхээс мэдэгдлээ. Эх барьж байгаа намын нөлөө орж байгаа тул маш олон өөрчлөлт шинэчлэлтүүдийг хийх нийгмийн шаардлага үүсэж байна. 

Ардчилсан намын 10 дугаар их хурал хүчин төгөлдөр бөгөөд гарсан шийдвэрийг тэр өдрөөс хойш хэрэгжүүлдэг. Ийм учраас ирэх гуравдугаар сарын 1-14-ны хооронд Ардчилсан намын анхан, дунд шатны нэгжүүд хуралдана. Уг хуралдаанаар Ардчилсан намын 11 дүгээр их хурлыг хийх талаар хэлэлцэх юм. Ардчилсан намын 11 дүгээр их хурал ирэх гуравдугаар сарын 18-20-ны хооронд Улаанбаатар хотноо ардчилсан намын гишүүд цуглаж, хуралдахаар бэлтгэл ажлаа хийж байна. Ерөнхийлөгчийн сонгуулийн бэлтгэл ажлын бэлтгэл ажил эхэлж байна. 

Улсын Дээд шүүх Ардчилсан намын үндсэн дүрмийн өөрчлөлтийн уг асуудалтай хамтатган бас нэгэн асуудлыг хэлэлцсэн нь намын даргын суудлаасаа огцорсон хирнээ намын нийт гишүүд дэмжигчдээ талцуулж, эв эвдэн, намын тамга тэмдгийг хүчингүй болгуулах зэргээр ёс зүйгүй авирласан үйлдэлд нь хариуцлага хүлээлгэн Ардчилсан намын гишүүнчлэлээс 8 жилийн хугацаагаар чөлөөлөгдсөн С.Эрдэнийн, өөрийгөө намын дарга хэмээн Улсын дээд шүүхийн цахим бүртгэлд бүртгэж өгөхийг хүссэн хүсэлтийг мөн хэлэлцсэн юм. Ингээд С.Эрдэнийг Ардчилсан намын дарга гэж үзэх ямар ч үндэслэлгүй хэмээн үзэж Улсын дээд шүүхийн цахим бүртгэлд бүртгэхээс татгалзсан шийдвэр гаргалаа. Сонирхуулахад захиргааны хэргийн шүүхээс С.Эрдэнийн хэрэглэж буй тамга, тэмдгийг түдгэлзүүлсэн шийдвэрийг 2-р сарын 4-ны өдөр гаргасан юм.

---