Монгол ардын намын 100 жилийн ой өнөө жил тохиож байна. 100 жилийн ойг МАХН ч, МАН ч аль аль нь тэмдэглэн өнгөрүүлэхээр зэхэж байна. Гэхдээ сүүлийн үед "угшил нэгтэй уг хоёр нам 100 жилийнхээ ой дээр нэгдэнэ" гэх яриа улстөрийнхний хүрээлэл дунд гарч эхэлжээ. 

Уг асуудлыг Ерөнхий сайд Л.Оюун-Эрдэнэ МАХН-ын дарга Н.Энхбаяр, Ерөнхий нарийн бичгийн дарга Б.Тулга, дэд дарга Э.Эрдэнэжамъян нарын хүмүүсийг хүлээн авч уулзах үеэрээ хөндөж, ярилцсан байна. Тэд 100 жилийнхээ ой дээр нэгдэж, Ерөнхийлөгчийн сонгуульд ч хамтран оролцож, ялалт байгуулна гэсэн зорилго тавьж байгаа бололтой.

Мөн намуудын нэгдлийн талаар МАХН-ын дарга Н.Энхбаяр 25-р суваг телевизийн "Ам нээвэл" ярилцлагад орох үеэрээ ч ярьжээ. Тэрээр МАХН, МАН хоёр нэгдэнэ гэдэг мэдээллийг үгүйсгэсэнгүй. 

МАХН-ын дарга Н.Энхбаяр,

"МАН, МАХН хоёрын нэгдэх эсэхийг намын жирийн гишүүд дэмжигчид болон ард түмний санал асуулгаар шийдэх хэрэгтэй. Гишүүд, дэмжигчид, ард түмэн манай хоёр намыг нэгдэх хэрэгтэй гэж үзвэл бид юу ч яриахгүй, нэгдэнэ" хэмэн ярьсан байна. 

Ийнхүү арван жилийн өмнө буюу 2011 онд 90 жилийнхээ ой дээр МАН, МАХН хэмээн тусдаа салж байсан тус нам 100 жилийнхээ ой дээр нэгдэж, дахин НЭГ НАМ болох алхмаа ярилцаж эхэлсэн нь тодорхой болжээ. Чухам тохироо, хэлэлцээндээ хүрч чадвал хэдхэн хоногийн дараа эхлэх 100 жилийн ойгоороо тэд ард түмэнд "гэнэтийн бэлэг" барьж магадгүй бололтой. 

---