Корнеллийн их сургуулийн оюутны дотуур байранд гарсан хүчингийн хэргийг дахин шалгаж эхэллээ
Томпкинс тойргийн прокурор Мэттью Ван Хоутен Корнеллийн их сургуулийн оюутны дотуур байранд үйлдэгдсэн бүлэглэн хүчирхийллийн хэргийн эрүүгийн мөрдөн шалгалтыг сэргээж, нотлох баримтуудыг тангарагтны шүүхэд танилцуулахаар болсныг мэдэгдлээ.
Энэхүү шийдвэр нь хохирогч эмэгтэй иргэний шүүхэд гомдол гаргасны дараа олны анхаарлыг хүчтэй татаж, нийгэмд эсэргүүцэл үүссэнтэй холбоотойгоор гарч байна.
Шүүхэд гаргасан гомдолд дурдсанаар, 2024 оны аравдугаар сард тухайн үед Корнеллийн их сургуулийн 20 настай оюутан байсан Жэйн Доу гэх эмэгтэй найзтайгаа уулзахаар Итака дахь "Chi Phi" оюутны дотуур байранд очжээ. Тус байрны хоёр гишүүн түүнд шахалт үзүүлэн кетамин, марихуан болон согтууруулах ундаа хэрэглүүлснээр эмэгтэй биеэ хянах чадваргүй болсон байна. Үүний дараа тус залуус цахим сүлжээний чатаар мэдээлэл тараан, шөнийн 01:42 цагаас өглөөний 05:45 цаг хүртэл хэд хэдэн эрэгтэй өрөөнд дараалан орж ирж, түүнийг олон цагийн турш удаа дараа хүчирхийлсэн гэж буруутгажээ.
Прокурорын алба хохирогч болон түүний өмгөөлөгчтэй холбоо тогтоосон бөгөөд эрүүгийн ял тулгах эсэхийг шийдвэрлүүлэхээр Томпкинс тойргийн их тангарагтны шүүхэд гэрчийн мэдүүлэг, нотлох баримтуудыг дэлгэхээр төлөвлөжээ. Өмнө нь эрүүгийн хэрэг үүсгээгүй шалтгаанаа тайлбарлахдаа прокурор Ван Хоутен хэлэхдээ, 2024 оны арваннэгдүгээр сард өгсөн хохирогчийн анхны мэдүүлэгт албадлага болон хүчирхийллийн шинж чанарыг дурдаагүй, бодис хэрэглэсэн явдлыг сайн дурын үндсэн дээр байсан мэтээр бичсэн байсан хэмээн тайлбарлав. Гэсэн хэдий ч бэлгийн хүчирхийллийн хүнд цочролыг даван туулахад олон жилийн сэтгэл заслын эмчилгээ шаардагддаг тул иргэний гомдол болон шинэ баримтуудад үндэслэн хэргийг дахин шалгах шаардлагатай гэж үзжээ.
Хохирогчийн өмгөөлөгч Томас Жуффра прокурорын тайлбарыг няцааж, тухайн үед цагдаад өгсөн мэдүүлэг нь иргэний шүүхэд гаргасан гомдлоос зарчмын хувьд огт зөрөөгүй хэмээн мэдэгдлээ. Түүнчлэн хэрэг гарснаас хойш гурван долоо хоногийн дараа хохирогч дотуур байрны цагдаад хандсан атал орон нутгийн эрх баригчид хангалттай шалгалт хийлгүй, хэрэгт хайнга хандсан хэмээн тэрбээр шүүмжилсэн байна.
Корнеллийн их сургууль 2024 онд дотоод мөрдөн шалгалт явуулж, холбогдох хоёр оюутныг сургуулиас хөөж, бусад гишүүдэд түдгэлзүүлэх зэрэг сахилгын шийтгэл оноож байсан ч эрүүгийн журмаар хэнийг ч баривчлаагүй байжээ. Их сургуулийн зүгээс прокурорын алба эрүүгийн хэргийг сэргээн шалгаж буй шийдвэрийг бүрэн дэмжиж, хамтран ажиллахаа илэрхийлээд байна.
Эх сурвалж:
• pbs.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.