ВИДЕО: Итали улсад үерийн улмаас 30 орчим хүн амиа алдаад байна

Эдгээр өдрүүдэд Итали улсын 10 гаруй жилийн түүхэнд тохиож байгаагүй үерийн гамшиг нүүрлээд байна. Үерийн улмаас 30 орчим хүн амиа алджээ.

Өнгөрсөн амралтын өдрүүдэд л гэхэд Сицилид нэг гэр бүлийн есөн хүн үерт автаж амиа алдсан байна. Шумбагчид усанд живсэн байшингаас амиа алдсан гэр бүлийн гишүүдийн цогцосыг гаргажээ.

Тэдний дунд нэг ба гурван настай хүүхдүүд байсан байна. Үерийн ус түрж орж ирэх үед гэрийнхээ гадаа байсан гурван хүн л амьд үлджээ.

Итали улсын баруун болон хойд нутагт аадар бороо асгарч, хүчтэй салхи шуурсны улмаас автозам ихээр эвдэрч, хөрсний гулсалт үүсээд байна.

Сицили, Венето, Сардини зэрэг зургаан мужид түгшүүр зарлажээ. Алдарт Венец хот үерийн улмаас тэрбум гаруй еврогийн гарз хохирол амсаад байгаа юм. Тус улсын Иргэнийг хамгаалах газраас нөхцөл байдлыг үргэлжлүүлэн хянаж, цахим сүлжээгээр цаг агаарын сэрэмжлүүлэх дохио илгээсээр байна.

Улаан загалмайн нийгэмлэгийн сайн дурын ажилчид аврах ажиллагаанд тусалж байна.

Эх сурвалж: www.bbc.com, www.cnn.com