Трамп сураггүй болсон сэтгүүлчид санаа тавилаа

Болгарын сурвалжлагч бүсгүй бусдын гарт онц хэрцгийгээр амиа алдсантай зэрэгцэн Саудын Арабын сэтгүүлч Жамал Кашогги сураггүй алга болсноор дэлхийн нийт хэвлэлийн эрх чөлөөнд анхаарал хандуулаад байна. 59 настай Жамал Кашогги энэ сарын хоёрны өдөр буюу Туркийн иргэн Хатич Чэнгизтэй гэрлэхийнхээ өмнөх орой гэрлэлтээ бүртгүүлэхэд шаардлагатай бичиг баримт авахаар Истанбуль дахь Саудын Арабын Консулын газар луу ороод сураггүй болсон.

Туркийн эрх баригчид Кашогги Консулын газраас эргэж гарч ирээгүй гэж үзсэн. Учир нь Саудын Арабын Консулын газрын ажилтнууд түүнийг гарч явсан гэж тодорхой мэдээлэл өгөлгүй долоо хоножээ. Кашоггиг дэмжигчид түүнийг Консулын байранд алуулсан байж магадгүй гэж үзэж, мөрдөн шалгах ажил явуулахыг олон улсын хүний эрхийн байгууллагуудаас шаардсаар байна. Харин Саудын эрх баригчид түүнийг сайн дураараа Консулын байранд үлдсэн гэж мэдэгдээд байгаа юм.

АНУ-ын Ерөнхийлөгч Дональд Трамп болон Төрийн нарийн бичгийн дарга Майк Помпео нар сэтгүүлч Жамал Кашоггийн хувь тавиланд ихээхэн санаа зовж байгаагаа илэрхийлэн тайлбар шаардсан байна. Хэрэв сураггүй болсон сэтгүүлчид ямар нэг муу зүйл тохиолдсон байвал Америк, Саудын харилцаанд сэв суухад хүрнэ гэдгийг анхааруулжээ. Турк, Саудын харилцаа хөндий биш тул Эрдоганы Засгийн газар Цагаан ордны байр суурийг анхааралтай ажиглаж байна.

Кашогги Саудын Арабт байхдаа алдартай сэтгүүлчдийн нэг байсан ба өнгөрсөн жил угсаа залгамжлах хунтайж Мохамед Бин Салманы эрх мэдлийг шүүмжлэн бичсэн хүмүүсийн нэг. Салманыг шүүмжилснийхээ дараа АНУ-д өөрийгөө цөлж, Вашингтон Пост сонинд нийтлэл бичдэг байжээ. Тэрээр “угсаа залгамжлах хунтайжийн яриад байдаг шинэ эрин айдас, сүрдүүлэг, баривчилгаа, олон нийтийн ичээсэн үйлдлээр дүүрэн” хэмээн шүүмжилдэг байжээ.

Эх сурвалж: www.aljazeera.com