Монголын шатарчид өрсөлдөгчөө “нусаар нь” хожив

Гүрж улсын Батуми хотод зохиогдож буй дэлхийн 43-р шатрын олимпиадын нээлтийн үйл ажиллагаа өнгөрсөн ням гаригт  Хар далайн эрэг дээрх Black Sea Arena цогцолборт боллоо. Нээлтийн ажиллагаанд Монголын Шатрын Холбооны Ерөнхийлөгч Ц.Сайнбаяр, УИХ-ын гишүүн, УИХ дахь Шатрын спортыг дэмжих бүлгийн гишүүн, шатрын зүтгэлтэн Д.Лүндээжанцан, олимпиадад Монгол Улсаа төлөөлөн оролцож буй баг тамирчид оролцсон байна. Шатрын олимпиадын эхний өрөг өчигдөр Batumi Sports Palace-д эхэлж, Монголын эрэгтэйчүүдийн баг Этиоп улсын багийг 4:0 харьцаатай хожин тэмцээний 46-д, эмэгтэйчүүдийн баг Шри Ланка улсын багийг мөн 4:0 хожиж тэмцээний 9-т жагсав. 

Олимпиадын нээлттэй ангилалд 185 орон, эмэгтэй ангилалд 150 орны нийт 1700 орчим тамирчин оролцож байна.