Украин ОХУ-ын нутаг дэвсгэрт 1,600 гаруй дроноор цохилт өгч, Москвагийн газрын тос боловсруулах үйлдвэрийг онилов
Украин 2026 оны есдүгээр сарын 20-нд ОХУ-ын нутаг дэвсгэрт томоохон хэмжээний дроны цохилт хийж, Москва болон Москва мужийг голлон онилжээ. ОХУ-ын Батлан хамгаалах яамны мэдээлснээр нийт 1,600 гаруй нисгэгчгүй төхөөрөмжийг агаарын довтолгооноос хамгаалах хүчнүүд устгаж, саатуулсан бөгөөд үүнээс 450 орчим нь Москва болон Москва муж руу чиглэсэн байна.
ОХУ-ын эрх баригчид уг халдлагыг нийслэлд болсон хамгийн том дроны дайралт гэж тодорхойлжээ. Халдлагын үеэр Москва хотын Капотня дүүрэгт байрлах “Газпром нефть”-ийн газрын тос боловсруулах үйлдвэрт гал гарсан байна. Reuters агентлагийн мэдээлснээр үйлдвэрийн түүхий тос нэрэх үндсэн хоёр төхөөрөмж гэмтэж, үйлдвэр түүхий тос боловсруулах ажиллагаагаа зогсоожээ. Засварын ажил хэдэн долоо хоног үргэлжилж болзошгүй гэж салбарын эх сурвалжууд мэдээлсэн байна.
Мөн Москва мужийн Раменское дүүрэгт орон сууцны 21 давхар барилга дроны хэлтэрхийд өртөж, 400 орчим хүнийг нүүлгэн шилжүүлжээ. Оросын эрх баригчдын мэдээлснээр халдлагын улмаас гурван хүн амиа алдаж, 20 орчим хүн шархадсан байна. Уг халдлага ОХУ-ын парламентын сонгуулийн санал хураалтын сүүлийн өдөр болсон бөгөөд Москвагийн захирагч Сергей Собянин үүнийг сонгуулийн үйл явцыг тасалдуулах зорилготой халдлага гэж мэдэгдсэн байна.
Харин Украины Ерөнхийлөгч Володимир Зеленський Оросын газрын тос, логистикийн байгууламжуудыг онилсон ажиллагаа гэж тайлбарлажээ. Үүний дараа ОХУ Украин руу шинэ цохилтууд хийсэн байна. Есдүгээр сарын 21-нд Оросын дронууд Запорожье хотын орон сууц, их сургууль, худалдааны төв зэрэг байгууламжийг онож, таван хүн шархадсан гэж Украины эрх баригчид мэдээлжээ. Украины агаарын довтолгооноос хамгаалах хүчин мөн 148 Оросын дроныг устгасан буюу саармагжуулсан байна.
Хамгийн сүүлийн мэдээллээр, есдүгээр сарын 22-ны шөнө Украины дронууд ОХУ-ын Самара муж дахь Куйбышевын газрын тос боловсруулах үйлдвэрт цохилт өгч, гал гарсан байна. Тус үйлдвэр жилд ойролцоогоор 3.7 сая тонн газрын тос боловсруулдаг бөгөөд Оросын цэрэг, аж үйлдвэрийн салбарт ашиглагддаг түлш үйлдвэрлэдэг байгууламж юм. Мөн хоёр талын эрчим хүчний байгууламжид чиглэсэн цохилтууд үргэлжилж байгаа энэ үед Украины Ерөнхийлөгч Зеленський болон АНУ-ын Ерөнхийлөгч Дональд Трамп эрчим хүчний дэд бүтцэд харилцан цохилт өгөхийг зогсоох боломжийн талаар хэлэлцэж байна.
Эх сурвалж:
•
• eagle.mn
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.