АНУ-д холбооны шугам тасарснаар олон мянган нислэг цуцлагджээ

АНУ-ын Зүүн эргийн агаарын тээврийн холбооны гол шугамд саатал гарсны улмаас орон даяар 5600-7000 орчим нислэг хойшлогдож, цуцлагдлаа. Филадельфи дахь бүсийн нислэгийн хяналтын төвийн харилцаа холбооны үндсэн сүлжээнд гэмтэл гарснаар Зүүн хойд бүсийн томоохон нисэх онгоцны буудлуудын үйл ажиллагаа бүхэлдээ саатсан бөгөөд Холбооны нисэхийн захиргаа (FAA) хяналтыг хэвийн болгохоор шуурхай ажилласан байна.

Агаарын тээврийн бүсийн диспетчерийн төвүүд нь радар болон нислэгийн мэдээллээ дамжуулахдаа үндсэн болон нөөц шугамд тулгуурладаг байна. Даваа гаргийн өглөөний 09:45 цагийн орчимд Филадельфийн хяналтын төвийн холбооны үндсэн сүлжээнд саатал гармагц систем нөөц шугам руу автоматаар шилжих оролдлого хийжээ. Гэвч Нью-Жерси муж дахь нөөц шилэн кабель нь "Amtrak" төмөр замын барилгын ажлын үеэр тасарсан байсныг албаныхан илрүүлсэн байна. Үүний улмаас агаарын тээврийн хянагчид ердийн радар болон холбооны хэрэгсэлгүй болж, нөхцөл байдал эрс хүндэржээ. 

Үүссэн доголдлын улмаас Холбооны нисэхийн захиргаанаас Нью-Йоркийн Жон Кеннеди, ЛаГуардиа болон Нью-Арк Либерти буудлуудад ирэх нислэгийг түр зогсоожээ. Мөн Филадельфи, Бостон Логан, Тетерборо болон Рейган Вашингтон нисэх буудлуудад нислэгүүд цагийн хуваарийн дагуу буух боломжгүй болсон байна. Саатлын үеэр Нью-Йорк орчмын гурван томоохон буудалд 1200-1400 орчим нислэг цуцлагдах буюу саатсан бол 100 гаруй агаарын хөлөг өөр чиглэлийн нисэх буудлууд руу чиглэлээ өөрчлөхөөс өөр аргагүйд хүржээ. 

Техникийн саатал нь НҮБ-ын Ерөнхий Ассамблейн чуулганд оролцохоор АНУ-ын Ерөнхийлөгч Дональд Трамп болон дэлхийн 130 орчим удирдагч, олон арван гадаад хэргийн сайд нар Нью-Йорк хотод хүрэлцэн ирж байсан үетэй давхацжээ. 

Эх сурвалж:

• news.rthk.hk

• insurancejournal.com

• cbc.ca

• thestandard.com.hk