Оросын бүс нутгуудад нэг өдөрт 344 нисгэгчгүй онгоц, дрон буудан унагажээ
ОХУ-ын Батлан хамгаалах яамнаас мэдээлснээр тус улсын агаарын довтолгооноос хамгаалах жижүүр анги нэгтгэлүүд 16 гаруй муж болон далайн усан хил дээр олон зуун нисгэгчгүй нисэх төхөөрөмжийг сөнөөж, болзошгүй аюулыг таслан зогсоожээ.
Зөвхөн есдүгээр сарын 19-нд шилжих шөнө л гэхэд 344 нисгэгчгүй онгоц, дрон буудан унагасан нь сүүлийн өдрүүдийн хамгийн хүчтэй довтолгоонуудын нэгд тооцогдож байна.
Шөнийн цагаар явуулсан дайралтын цар хүрээ газар зүйн хувьд өргөн бүсийг хамарсан бөгөөд Брянск, Курск, Белгород, Орёл, Калуга, Тула, Рязань, Липецк, Владимир, Ростов, Ленинград, Новгород мужуудыг онилжээ. Түүнчлэн Москва муж, Краснодарын хязгаар, Дагестаны Каспийск орчим болон алс хойд хэсгийн Ямало-Ненецийн автономит тойрог хүртэлх бүсүүд, Хар тэнгисийн усан мандал дээгүүр дронуудыг амжилттай устгасан байна. Халдлагын улмаас Курск мужийн Дмитриев хотын орон сууцны барилгын цонх хагарч сүйдсэнээс өөр ноцтой хохирол гараагүй аж.
Мөн есдүгээр сарын 19-ний өдрийн 08:00-аас 20:00 цагийн хооронд агаарын хамгаалалтынхан Белгород, Курск, Брянск, Нижегород зэрэг бүсүүд, Крым болон Хар тэнгисийн орчмоос дахин 288 нисгэгчгүй төхөөрөмжийг устгасан тухай тайлагнав. Үүнээс гадна есдүгээр сарын 18-ны өдөр 328 дроныг амдан сөнөөжээ. Тухайлбал, Брянск мужийн нутаг дэвсгэрт хоногийн хугацаанд агаарын хамгаалалтын системүүд, "БАРС-Брянск" отряд, тээврийн цагдаа болон Росгвардийн тусгай хүчнийхэн хамтран нийт 288 ширхэг нисэх төхөөрөмжийг аюулгүй болгожээ.
Эдгээр дараалсан өргөн цар хүрээтэй довтолгоонууд нь ОХУ-ын бүс нутгуудад Төрийн Думын сонгуулийн санал хураалт явагдаж байсан есдүгээр сарын 18-20-ны өдрүүдтэй цаг хугацааны хувьд шууд давхацсан байгаа аж.
Эх сурвалж:
• ngs.ru
• news.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.