"Нэгдсэн Орос нам"-ын сурталчилгаанд тоглосны улмаас Александр Овечкиныг Канадаас хөөхийг уриалав
Хойд Америкийн Үндэсний хоккейн лиг (NHL)-ийн “Вашингтон Кэпиталз” багийн ахлагч Александр Овечкин ОХУ-ын парламентын сонгуулийн өмнө ерөнхийлөгч Владимир Путины эрх баригч “Нэгдсэн Орос нам"-ыг дэмжсэн сурталчилгаанд оролцсоноос үүдэн олон улсын ширүүн эсэргүүцэлтэй тулгараад байна.
Уг бичлэгт эрх баригч намаас нэр дэвшиж буй ОХУ-ын Гадаад хэргийн сайд Сергей Лавров "Москвагийн дайснуудад хандан өршөөл үзүүлэхгүй" гэж мэдэгдэж байх үед Овечкин түүний ард зогсож буй нь гарчээ. Энэхүү дүрс бичлэгт хоккейн од өөрөө үг хэлээгүй бөгөөд түүнтэй зэрэгцэн “RT” агентлагийн ерөнхий редактор Маргарита Симоньян, жүжигчин Владимир Машков, дуучин Татьяна Куртукова болон Зөвлөлтийн үеийн домогт тамирчин Вячеслав Фетисов нар хамт оролцсон байна.
Багийнхаа бэлтгэлийн үеэр Овечкин сэтгүүлчдэд тайлбар өгөхдөө уг бичлэгт оролцсоноо хамгаалж, өөрийгөө эх орноо дэмждэг орос хүн тул тавьсан хүсэлтийг зөвшөөрсөн гэдгээ мэдэгджээ. Мөн тэрбээр тамирчны замналаа өндөрлүүлсний дараа гэр бүлээрээ ОХУ-д бүрмөсөн амьдрахаар төлөвлөж буйг сануулаад, энх тайвны төлөө байр суурьтай явдгаа онцолсон юм.
“Вашингтон Кэпиталз” клубийн хэвлэлийн төлөөлөгч Сергей Кочаров түүнийг улирлын амралтаараа эх орондоо амьдардаг иргэн болохыг дурдаж, багийн анхаарал зөвхөн мөсөн талбайн тоглолтод чиглэж байгааг хэлсэн бол NHL-ийн удирдлага албан ёсны тайлбар хийхээс татгалзжээ.
Овечкины энэхүү үйлдэл нь олон улсын түвшинд хүчтэй шүүмжлэл дагуулж, улс төрийн арга хэмжээ авахад хүргэлээ. Бүгд Найрамдах Латви Улсын Гадаад хэргийн яам Овечкиныг тус улсын хилээр нэвтрэхийг албан ёсоор хориглосон байна. Түүнчлэн Канадын 1.3 сая украин үндэстнийг төлөөлдөг Украины Канадын конгресс уг сурталчилгааг зэмлэн буруушааж, тамирчинд хориг арга хэмжээ авч Канад руу нэвтрэх эрхийг нь хаахыг уриалжээ. Мөн АНУ-ын Конгрессын төлөөлөгч Жо Вилсон НХЛ-ийн тэргүүн Гэри Беттманд хандан албан захидал илгээж, лигийн бодлогыг эргэн харахыг шаардсан байна.
Спортын хүрээлэлд ч эсэргүүцэл өрнөж, Чехийн домогт хаалгач Доминик Гашек нийгмийн сүлжээгээр дамжуулан Овечкин болон Фетисов нарыг Оросын дайныг албан ёсоор дэмжих сонголт хийлээ хэмээн буруутгав. Нэр хүндтэй тамирчны улс төрийн сонголт ийнхүү олон улсын хэмжээнд зорчих эрхийн хориг болон дипломат шахалтад хүрч, спортын ертөнц дэх геополитикийн маргааныг улам хурцатгаж байна.
Эх сурвалж:
• tsn.ca
• kq2.com
•
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.