НХОГ-ын удирдлагын хахуулийн хэргийг шүүхэд шилжүүлэв

Нийтийн албан тушаалтнууд болон НХОГ-ын дарга С.Цэдэнсодном, ерөнхий инженер Т.Оргил-Эрдэнэ тэргүүтэй хүмүүс Барилгын ажил гүйцэтгэх гэрээний дагуу хийж буй зам, барилгад захиалагчийн хяналт тавих чиг үүргээ хэрэгжүүлэхдээ аж ахуйн нэгжийн удирдлагуудад давуу байдал бий болгож, хахууль авсан, үндэслэлгүйгээр хөрөнгөжсөн, мөнгө угаасан хэрэгт холбогдсон юм. 2024 оны арваннэгдүгээр сарын сүүлчээр С.Цэдэнсодномыг гадаадаас ирмэгц нь онгоцны буудал дээр саатуулсан бөгөөд 100-200 орчим сая төгрөгийн хахууль авсан, өндөр үнэтэй амины орон сууц захиалсан, “Мерседес бенз” загварын автомашин худалдан авсан хөрөнгийнхөө эх үүсвэрийг бодитой тайлбарлаж чадахгүй, үндэслэлгүй хөрөнгөжсөн, мөнгө угаасан зэрэг үйлдэлд холбогдуулан шалгаж эхэлсэн билээ. Энэ хүрээнд ерөнхий инженер Т.Оргил-Эрдэнийг ч албадан саатуулж байсан юм. Уг хэрэгт зам, барилгын чиглэлээр үйл ажиллагаа явуулдаг “Ванхүү”, “Цагаантолгойн нуур”, “Байгаль алтай”, “Баянхайрхан эко”, “Бэсүбконстракшн”, БНХАУ-ын “Чайнарейлвэй” гэх аж ахуйн нэгжүүд холбогджээ.

Учир нь НХОГ-ын албан тушаалтнуудад хуулийн этгээдийн нэрийн өмнөөс хахууль өгсөн гэж удирдлагыг нь яллагдагчаар татсан гэнэ. Тус газрын албан тушаалтнуудад НПГ-аас Эрүүгийн хуулийн 22.1-2, 22.4-1, 22.4-2, 22.10-1, 18.6-2.1 дэх хэсэгт зааснаар яллах дүгнэлт үйлдсэн юм байна. Ташрамд дурдахад, Сүхбаатар дүүргийн ЗДТГ-ын даргаар ажиллаж байсан И.Одончимэгт холбогдох хэрэгт “Ванхүү” ХХК, түүний үүсгэн байгуулагч Б.Боролзойхүүг хахууль өгсөн хэмээн яллагдагчаар тооцсон бөгөөд Баянзүрх, Сүхбаатар, Чингэлтэй дүүргийн эрүүгийн хэргийн анхан шатны тойргийн шүүхээс хэргүүдийг нь нэгтгэн шийдвэрлэх ёстой хэмээн прокурорт буцаачихаад буй. Тэгэхээр Баянгол, Хан-Уул, Сонгинохайрхан дүүргийн эрүүгийн хэргийн анхан шатны тойргийн шүүхэд шилжүүлсэн С.Цэдэнсодном, Т.Оргил-Эрдэнэ тэргүүтэй албан тушаалтнуудын хэргийг Б.Боролзойхүүгийн хахууль өгсөн, прокурорт буцаасантай нь нэгтгүүлэхээр шийдвэр гаргах магадлал өндөр байгаа юм.