🔴Ш.Баранчулуун: Туулын хурдны зам баригдах нь эдийн засгийн үр өгөөжөөс гадна үерийн эрсдэлээс хамгаална

Нийслэл хотод хэрэгжихээр төлөвлөгдөж буй "Туул усан цогцолбор" болон "Туулын хурдны зам" төслүүд нь хоорондоо нягт уялдаатай бөгөөд Улаанбаатар хотын үерийн эрсдэлийг бууруулах, хөрсний усны менежментийг сайжруулах давуу талтайг усны инженер Ш.Баранчулуун хэлж, инженерийн тооцоолол болон байгаль орчинд үзүүлэх нөлөөллийн талаарх мэргэжлийн дүгнэлтийг танилцууллаа.

Усны инженер Ш.Баранчулуун: 

-Хурдны зам баригдсанаар Туул голын урсац тасалдах, бохирдох, эсвэл ширгэх аюултай гэсэн болгоомжлол иргэдийн дунд байна. Нарийвчилсан инженерийн тооцоогоор ийм сөрөг үр дагавар гарахгүй нь тогтоогдсон. Гол дотор гүүрэн тулгуурууд босгох үед урсгалын эсрэг 30 орчим сантиметрийн сөрөг долгион буюу усны эсрэг цохилт үүсэх тооцоо гарсан. Гүүр баригдах хэсэгт голын голдирол бага зэрэг нарийсч, урсгалын хурд хэсэгхэн газарт нэмэгдэх ч энэ нь байгаль орчинд ноцтой эрсдэл учруулахгүй.

"Туулын хурдны зам" нь зөвхөн замын түгжрэлийг бууруулаад зогсохгүй нийслэлийг үерийн аюулаас хамгаалах ач холбогдолтой. Төслийн хүрээнд хурдны замын 18.2 км орчим хэсэг нь үерийн хамгаалалтын өндөр далан дээгүүр тавигдах тул хотыг үерийн эрсдэлээс бүрэн хамгаална. Харин үлдсэн 7.1 км газар нь гүүрэн дамжуургаар явна. Зам болон хотын завсраар үерийн хамгаалалтын даланг цогцоор нь шийдэж барих шаардлагатай.

Үерийн хамгаалалтын барилга байгууламж нь шууд эдийн засгийн ашиг өгдөггүй ч урт хугацаандаа олон мянган иргэний амь нас, эд хөрөнгө, барилга байгууламжийг аюулаас хамгаалдаг нийгэм, эдийн засгийн хувьд өндөр ач холбогдолтой. 

төслийн нарийн төвөгтэй инженерийн шийдэл, тооцооллыг иргэдэд энгийн, ойлгомжтой хэлбэрээр танилцуулах шаардлагатай. Мөн "Хатан Туулаа хамгаалъя" хөдөлгөөнийхний зүгээс тавьж буй мэргэжлийн шаардлага, санал шүүмжлэлийг авч үзэж, дараа дараагийн мега төслүүд болон хурдны замын бүтээн байгуулалтад тусган ажиллах нь зүйтэй гэв.